وبلىس اكىمى گۇلشارا ابدىقالىقوۆا سىرداريانىڭ سول جاعالاۋىنداعى نىساندارمەن تانىستى. بۇل تۋرالى وبلىس اكىمىنىڭ ءباسپاسوز قىزمەتى حابارلادى.
2017-2019 جىلدار ارالىعىندا سول جاعالاۋدا مەملەكەتتىك بيۋدجەت جانە جەكە ينۆەستورلاردىڭ ەسەبىنەن كوپقاباتتى 48 تۇرعىن ءۇي, جاستار رەسۋرستىق ورتالىعى, قازاق ورتالىق اتقارۋ كوميتەتىنىڭ مۋزەيى, «بولاشاق» ۋنيۆەرسيتەتىنىڭ وقۋ كورپۋسى, 700 ورىندىق جەكە مەكتەپ جانە 320 ورىندىق بالاباقشا بوي كوتەرگەن.
«بولاشاق» ۋنيۆەرسيتەتىنىڭ 12 قاباتتى عيماراتىندا «بولاشاق-ستارتاپ» يننوۆاتسيالىق يدەيالاردى ىسكە اسىرۋ ورتالىعى, كوۆوركينگ ورتالىعى, عىلىمي-زەرتتەۋ ينستيتۋتى, اگروبيوتەحنولوگيالاردىڭ عىلىمي زەرتحاناسى, الەۋمەتتىك-ەكونوميكالىق جانە ساياسي زەرتتەۋلەر ورتالىعى, تەلەستۋديا, ديزاين جانە حورەوگرافيا ستۋديالارى, جاستار تەاترى جۇمىس ىستەيدى.
جاستار رەسۋرستىق ورتالىعىندا IT-park, فيتنەس زال, كىتاپحانا, كوۆوركينگ بولمەسى جانە انتيكافە بار. مۇندا ستۋدەنتتەر مەن وقۋشىلار اقپاراتتىق تەحنولوگيالاردىڭ قىر-سىرىنا ءۇڭىلىپ, بىلىمدەرىن ارتتىرا الادى. 3D ستۋديا جانە روبوتتاندىرىلعان تەحنيكانى مەڭگەرۋگە دە مۇمكىندىك قاراستىرىلعان.
ارالاۋ بارىسىندا وبلىس اكىمىنە سول جاعالاۋدا سالىناتىن الەۋمەتتىك-مادەني جانە ءبىلىم بەرۋ نىساندار تۋرالى مالىمەت بەرىلدى. جوباعا سايكەس الداعى ۋاقىتتا مۇندا 300 ورىندىق كوپبەيىندى اۋرۋحانا, 300 ورىندىق فيزيكا-ماتەماتيكا مەكتەبى, دراما تەاتر, 900 ورىندىق ورتا مەكتەپ, نەكە سارايى جانە بيزنەس ورتالىق بوي كوتەرەدى.
قازىر كوپقاباتتى 5 تۇرعىن ءۇيدىڭ قۇرىلىسى ءجۇرىپ جاتىر. بيىل «نۇرلى جەر» مەملەكەتتىك باعدارلاماسى اياسىندا تاعى كوپقاباتتى 12 ءۇيدىڭ قۇرىلىسى باستالادى دەپ كۇتىلۋدە.
ايماق باسشىسى شىركەيلى كانالى ارقىلى ءوتىپ, سول جاعالاۋ مەن «باتىس ەۋروپا-باتىس قىتاي» كولىك ءدالىزىن بايلانىستىراتىن كوپىر قۇرىلىسىمەن تانىستى.
ءتورت جولاقتى كوپىردىڭ ۇزىندىعى - 102,8, ەنى - 21 مەتر. قۇرىلىس جۇمىستارى رەسپۋبليكالىق جانە جەرگىلىكتى بيۋدجەت ەسەبىنەن جۇرگىزىلىپ جاتىر. قازىر رەسپۋبليكادان قارالعان قاراجات تولىق يگەرىلگەن.
– وبلىستا قارجىلاندىرۋدى قاجەت ەتەتىن جوبالار كوپ. باستالعان جوبالار, اتاپ ايتقاندا وسى كوپىر قۇرىلىسى دەر كەزىندە اياقتالۋى كەرەك. سونىمەن قاتار ءبىز تۇرعىنداردىڭ, اسىرەسە از قامتىلعان وتباسىلاردىڭ ءال-اۋقاتىن ويلاۋىمىز قاجەت. سوندىقتان قارجىنى بولەر الدىندا, بۇگىنگى جاعدايعا يكەمدەلگەن, ەڭ قاجەت دەگەن جوباعا باسىمدىق بەرىلەدى, - دەدى وبلىس اكىمى.
ءوڭىر باسشىسى نىسانداردى ارالاۋ سوڭىندا سول جاعالاۋدى دامىتۋ جوباسى جالعاساتىنىن ايتىپ, اسىرەسە تۇرعىن ءۇي قۇرىلىسىنىڭ ساپاسى مەن مەرزىمىنە كوڭىل ءبولۋدى تاپسىردى.