كوروناۆيرۋس ىندەتىنىڭ تارالۋىنا بايلانىستى سكايپ ارقىلى وتكەن شۇعىل بريفينگتە اقمولا وبلىستىق دەنساۋلىق ساقتاۋ باسقارماسىنىڭ باسشىسى سۇلەن ءىلياسوۆ مالىمدەمە جاسادى.
وڭىرىمىزدە 13 ساۋىردە كوروناۆيرۋس ىندەتىنە قاتىستى كوز جۇمعان تاعى ءبىر وقيعا تىركەلدى. ول الەۋمەتتىك قىزمەت كورسەتۋ ورتالىعىندا تۇرعان 1936 جىلى تۋعان ەر ادام. ناۋقاس 5 ساۋىردەن باستاپ كوكشەتاۋ قالاسىنداعى تەمىرجول اۋرۋحاناسىنداعى پروۆيزورلىق ستاتسيوناردا كارانتيندە جاتقان. 9 ساۋىردە ودان كوروناۆيرۋس ىندەتى راستالىپ, اقمولا وبلىستىق تۋبەركۋلەزگە قارسى كۇرەس ديسپانسەرىنىڭ ينفەكتسيالىق بولىمىنە ەمدەلۋگە جاتقىزىلادى. ناۋقاستىڭ ديسپانسەرگە قابىلدانعان كەزىندەگى دەنساۋلىق جاعدايى وتە اۋىر بولعان. سوندىقتان, وكپەسى جاساندى جەلدەتۋ قۇرىلعىسىنا قوسىلعان.
ناۋقاستا ەكى جاقتى جاپپاي پنەۆمونيا ءارى ونىڭ تەز داميتىن وتە اۋىر ءتۇرى جانە ۆيرۋستىق ەتيولوگيا, ارتەريالدى گيپەرتونيا, جۇرەكتىڭ يشەميالىق اۋرۋى سىندى ىلەسپە اۋرۋلار بولعان.
اقمولا وبلىسىنا قاتىستى كوروناۆيرۋس جاعدايى بويىنشا بۇگىندە اۋرۋحانادا 347 ناۋقاس, ونىڭ ىشىندە ينفەكتسيالىق بولىمدە 67, پروۆيزورلىق ستاتسيوناردا 184, كارانتيندە 96 ادام بار. ال, ءۇي جاعدايىنداعى كارانتيندە 662 ادام باقىلاۋدا.
جالپى, وڭىرىمىزدە 71 ادامدا كوروناۆيرۋس تىركەلگەن, ونىڭ ىشىندە 4-ەۋى وسى ىندەتتەن قايتىس بولدى.
اقمولا وبلىسى