بيىلعى جىلى ۇلى اقىن اباي قۇنانباي ۇلىنىڭ 175 جىلدىعى رەسپۋبليكا كولەمىندە اتالىپ وتىلۋدە. وسىعان وراي, وبلىستىق حالىق شىعارماشىلىعى ورتالىعى دا ءوز ۇلەسىن قوسىپ, «دارا - اباي, دانا - اباي» جازبا اقىندار اراسىندا رەسپۋبليكالىق ونلاين اقىندار ايتىسىن وتكىزبەكشى.
ال, جىرسۇيەر قاۋىم جارىس بارىسىن باستان-اياق وبلىستىق حالىق شىعارماشىلىعى جانە دەمالىس ورتالىعىنىڭ الەۋمەتتىك جەلىلەردەگى Facebook, Instagram پاراقشالارىنان تاماشالاي الادى. ونلاين-ايتىستىڭ وزىنە ءتان ەرەكشەلىكتەرى مەن قيىندىقتارى بار. اسىرەسە جازبا اقىندار ءۇشىن بۇل تىڭ دۇنيە. بىراق, وسىنداي ۋاقىتشا قيىن تۇستا ەلدىڭ ەڭسەسىن تىكتەپ, حالىقتىڭ رۋحىن كوتەرۋگە ارنالعان دۇنيەگە اقىندار بەلسەنە اتسالىسۋدا. ولارعا قويىلاتىن باستى تالاپ – ۇلى ويشىلدىڭ ادەبي مۇرالارى مەن قازاق رۋحانياتىنا ارناعان شىعارمالارىن تىلگە تيەك ەتۋ. سونىمەن قاتار, ەل ىشىندەگى وتكىر ماسەلەلەردى دە وتتى جىرلارىنا قوسا وتىرىپ, قارسىلاسىمەن ءسوز قاعىستىرۋ. ال, ايتىسقا قاتىسامىن دەگەن اقىنداردىڭ جاسىنا شەكتەۋ قويىلمايدى. جىر بايگەسى 3 كەزەڭنەن تۇرادى. العاشقى كەزەڭدە اقىندار قارىم-قابىلەتىنە قاراي ىرىكتەلەدى. ودان سوڭ جارتىلاي اينالىمدا جۇپتاسىپ ايتىسادى. وسى ەكى كەزەڭنەن سۇرىنبەي وتكەن اقىندار ماۋسىم ايىندا وتەتىن اقتىق سىندا باق سىنايدى. قازىرگى كەزدە اقىنداردى ىرىكتەۋ كەزەڭى وتۋدە.
– قازىرگى ۋاقىتتا اقىنداردىڭ وتىنىمدەرىن قابىلداپ جاتىرمىز. ىرىكتەۋ كەزەڭىنەن وتكەن اقىنداردى جۇپتايمىز. ولارعا الدىن-الا حابارلانادى. ەكى اقىنعا ءبىر تاۋلىك ۋاقىت بەرىلەدى. سول ۋاقىت ىشىندە ولار ءبىر-بىرىمەن جاۋاپتاسىپ ايتىسۋ كەرەك. ەگەر دە قانداي دا ءبىر جاعدايعا بايلانىستى اقىنعا جاۋاپ بەرىلمەي كەشىگىپ جاتسا جەڭىلدى دەپ ەسەپتەلەدى. ولارعا جەرگىلىكتى اقىندار مەن ادەبي سىنشىلار قازىلىق ەتەدى. بۇل ايتىستىڭ وتۋىنە بىرىنشىدەن وبلىستىق مادەنيەت, ارحيۆتەر مەن قۇجاتتامالار باسقارماسى قولداۋ تانىتتى,–دەيدى وبلىستىق حالىق شىعارماشىلىعى جانە مادەني دەمالىس ورتالىعىنىڭ كوركەمدىك جەتەكشىسى توقتاربەك قالدىرباەۆ.
ايتىستىڭ قىزىعىن ونلاين ارقىلى دا قىزدىرۋعا بولادى ەكەن.