اقمولاداعى كوكتەمگى قاربالاس

قولداۋ شارالارى شاعىن شارۋا قوجالىقتارىنىڭ يەلەرىن دە قامتىپ وتىر. مەملەكەت باسشىسىنىڭ 31 ناۋرىزداعى مالىمدەمەسىنە سايكەس ديقانشىلارعا  قولداۋ رەتىندە مەملەكەتتەن 100 ميلليارد تەڭگە بولىنەدى. بۇل دا شارۋالارعا دەر كەزىندە كورسەتىلىپ وتىرعان زور قولداۋ. 

فەرمەرلەر ءۇشىن بيىل دا مەملەكەتتەن قولداۋ زور. مەملەكەت باسشىسى اۋىلشارۋاشىلىعىمەن اينالىساتىن قۇرىلىمدار ءۇشىن بيۋدجەتتەن 70 ميلليارد تەڭگە بولىنەتىنىن جەتكىزدى. بۇل شەشىم شارۋالاردىقاناتتاندىرىپ وتىر.   

–مەملەكەت باسشىسىنىڭ تاپسىرماسىمەن ۇكىمەتتەن اقمولا وبلىسىنا 68 مىڭ توننا ارزانداتىلعان ديزەلدى وتىن ءبولىندى. ناۋرىزداعى قاجەتتىلىكتى ءبىز ساتىپ الدىق. بۇگىندە ونىڭ قۇنىن ارزانداتۋ ماسەلەسى قاراستىرىلىپ جاتىر. قازىردە تونناسىن 174 مىڭ تەڭگەدەن ساتۋ بويىنشا حاتتاما كەلدى. ديزەل وتىنىنىڭ ءبىر ءليترى 165-168 تەڭگەدەن ساتىلادى. بۇل اۋىل شارۋاشىلىعى ونىمدەرىن ارزانداتىپ ساتۋعا دا مۇمكىندىك بەرەدى,–دەيدى وبلىستىق اۋىل شارۋاشىلىعى باسقارماسى باسشىسىنىڭ مىندەتىن اتقارۋشى ديماش تالاسباەۆ.

بۇگىندە اقمولا وبلىسىنىڭ شارۋالارى كوكتەمگى ەگىس ناۋقانىنا قىزۋ دايىندىق ۇستىندە. وبلىس شارۋالارىنا بۇگىندە 527 مىڭ توننا كولەمىندە تۇقىم قاجەت. كارانتين جاعدايىندا ونى جەتكىزۋدە ەشقانداي كەدەرگى بولمايدى. سەبەبى, وبلىستىق اكىمدىك جانىنداعى ارنايى شتاب كوكتەمگى ەگىس ناۋقانىنا قاجەت تاۋاردى جەتكىزۋ ءۇشىن ارنايى رۇقسات قاعازدارىن بەرەدى. وبلىستىق اۋىلشارۋاشىلىعى باسقارماسى شارۋالاردى كوكتەمگى ەگىس ناۋقانىن جۇرگىزۋدە قاۋىپسىزدىك شارالارىن قاتاڭ ساقتاۋدى شاقىرادى.

اقمولا وبلىسى