وبلىس ورتالىعىنداعى «تىنىس» زاۋىتى توتەنشە جاعداي كەزىندە جۇمىس ورىندارىن ساقتاپ وتىر. كاسىپورىندا 750 جۇمىسشى ەكى اۋىسىمدا قىزمەت ەتەدى. جۋىردا تاعى 100-گە جۋىق ادام جۇمىسقا ورنالاستى.
«تىنىس» كاسىپورنى جۇمىسشىلار الدىنداعى الەۋمەتتىك جاۋاپكەرشىلىكتى ءبىرىنشى كەزەككە قويىلىپ وتىر. قازىرگى تاپسىرىستىڭ باسىم كوپشىلىگى الەمدىك پاندەمياعا قاجەتتى قۇرال-جابدىقتار.
–قازىرگى باستى مىندەت تورتكۇل دۇنيەنى تەڭسەلتىپ تۇرعان جامان اۋرۋمەن جاعالاسۋ. جاعالاسۋ عانا ەمەس, جەڭىپ شىعۋ. جۇمىسشىلارىمىزدىڭ الەۋمەتتىك جاعدايىن, ىندەتپەن كۇرەسۋدىڭ امالدارىن جاساپ جاتىرمىز. ءبىزدىڭ كاسىپورىندا قالاداعى عيماراتتاردى, كولىكتەردى زالالسىزداندىراتىن جىلجىمالى قوندىرعىلار دايىندالادى. ازىرگە ونىڭ 500 داناسىن تۇتىنۋشىلارعا تاپسىردىق. بۇرىن بۇل قوندىرعى كاسىپورىننىڭ نەگىزگى ءونىمى بولماعاندىقتان, جىلىنا 20-30-ىن عانا دايىنداۋشى ەدىك, ەندى ايىنا ەلۋدەن استامىن دايىنداۋعا كوشتىك. ونىڭ 17-ءسىن جەرگىلىكتى اكىمشىلىك ارقىلى ءبىزدىڭ تۋبەركۋلەزگە قارسى كۇرەس ديسپانسەرى الدى,–دەيدى «تىنىس» اكتسيونەرلىك قوعامىنىڭ باس ديرەكتورى قايرات قالمانباەۆ.
اپپاراتتى قۇراستىراتىن بولشەكتەر رەسەيدەن الىنادى. قازىرگى جاعدايعا بايلانىستى بۇل جۇمىس ءبىراز ىركىلىپ قالعان. ايتسە دە, مينيسترلىك دەڭگەيىندە بۇل ماسەلە شەشىلىپ جاتىر. قازىرگى تاڭدا كاسىپورىندا 850-دەن استام ادام ەڭبەك ەتەدى. دايىن ونىمگە دەگەن سۇرانىس كۇننەن-كۇنگە ارتۋدا. زاۋىتتىڭ ينجەنەر-كونسترۋكتورلارى جۇمىسشىلاردىڭ دەنساۋلىعىن قورعاۋ ماقساتىندا تاعى ءبىر جاڭا قوندىرعى ويلاپ تاۋىپتى.
–سىرتتان كەلەتىن جۇمىسشىلاردى دەزينفەكتسيالاۋعا ارنالعان قۇرىلعى. ەرىتىندىنىڭ قۇرامىندا 60-70 پروتسەنت سپيرت بار. مۇنداي قۇرىلعىلار قىتاي, تۇركيا زاۋىتتارىندا جاسالادى ەكەن. اسا قاجەت وسى قۇرىلعىنى ءبىز دە جاساي الامىز,–دەيدى «تىنىس» اكتسيونەرلىك قوعامى ەنەرگو-مەحانيكالىق قىزمەتىنىڭ باستىعى قانات اقىلبەكوۆ.
قازىرگى ۋاقىتتا زاۋىتتا مەديتسينالىق ماسكالار تىگۋ ءىسى دە قولعا الىنعان. وتاندىق ەلەكتر قوزعالتقىشتى مۇگەدەكتەر ارباسى دا وسى زاۋىتتا قۇراستىرىلادى.
كوكشەتاۋ قالاسى