كەشە وبلىس ورتالىعىنا اقتاۋ-كوكشەتاۋ باعىتىنداعى اۋە رەيسى كەلىپ قوندى. 30 جولاۋشى ۇشىپ كەلدى. كوكشەتاۋدىڭ اۋە قاقپاسى كۇشەيتىلگەن سانيتارلىق باقىلاۋعا الىندى. ولاردىڭ بارلىعى قاتاڭ تالاپ بويىنشا ارنايى قاۋىپسىزدىك شارالارىنان ءوتتى.
«اقتاۋ-كوكشەتاۋ» رەيسىمەن كەلگەن بارلىق ازاماتتار الدىمەن مىناداي ساۋالناما پاراعىن تولتىردى. مۇندا ازاماتتىڭ اتى-ءجونى, مەكەنجايى ءتارىزدى اقپاراتتار جازىلادى. بۇل ۇشىپ كەلگەندەر اراسىندا ىندەت انىقتالسا, ولاردى تەز ارادا ىزدەستىرۋگە باعىتتالعان شارا قابىلدانادى. سونداي-اق, ساۋالناماداعى باستى سۇراق سوڭعى 14 كۇن ىشىندە قانداي ەلدەردە بولعاندىعى. ەگەر, جولاۋشى 1ا كاتەگوريالى ەلدەرگە بارعانىن راستاسا, 14 كۇن كارانتينگە جاتقىزىلادى. ال, وزگەب ساناتتاعى ەلدەردەن كەلگەن ازاماتتار ەكى اپتادا ءۇي كارانتينىنەن ءوتۋى ءتيىس.
–ۆوكزالدار مەن اۋەجايلاردا وتباسىمەن, جاس بالالارمەن ساپارلاپ جۇرگەن ادامداردى ءالى دە كەزدەستىرەمىز. بۇل ۇلكەن قاتەر. سوندىقتان, جاعدايدى جالپى جۇرتقا ءالى دە تۇسىندىرۋگە تۋرا كەلەدى,–دەيدى وبلىستىق كولىكتەگى تاۋارلار مەن كورسەتىلەتىن قىزمەتتىڭ ساپاسى مەن قاۋىپسىزدىگىن باقىلاۋ باسقارماسىنىڭ جەتەكشى مامانى سۆەتلانا شاپوۆالەنكو.
اۋەجاي قىزمەتكەرلەرى كولىكتەگى قىزمەت پەن قاۋىپسىزدىككە جاۋاپتى ەپيدەميولوگتارمەن كۇش بىرىكتىرگەن. ماماندار قاشىقتان دەنە قىزۋىن ولشەۋ قۇرىلعىلارى, جۇقپالى ىندەتتەن قورعانۋ كوستيۋمدەرىمەن قامتاماسىز ەتىلگەن.
كارانتين باستالعالى وبلىس ورتالىعىنداعى اۋە تاسىمالى بارىنشا شەكتەلدى. ماماندار باستى جاۋاپكەرشىلىك قاراپايىم تۇرعىنداردا ەكەندىگىن ەسكەرتەدى. توتەنشە جاعداي رەجيمىندە قانداي دا ءبىر ساپارعا شىعۋدان باس تارتۋ اسا ماڭىزدى.