اقان سەرىنىڭ اقتىق ءسوزى

تومەندە جاريالانىپ وتىرعان اقان سەرىنىڭ ولەڭى ءومىرىنىڭ سوڭىندا بۇل دۇنيەنىڭ قىزىلدى-جاسىلدى قىزىعىنان باز كەشىپ ايتقانى. وقىرمانعا وي سالاتىن-اق دۇنيە. ورايى كەلگەندە وقىپ شىققاننىڭ ارتىعى بولماس.

 

اسسالاۋماعالەيكۋم, ناۋان اعا!

ءۇي-ءىشى امان بولار بالا-شاعا.

كورگەن سوڭ ديدارىڭدى بويىم سەرگىپ,

قالدىم عوي شىققانداي بوپ ساحاراعا.

 

جابىرقاپ جاتىر ەدىم ادام كەلمەي,

كوپ ەدى قادىرلەسىم وزىڭىزدەي.

ساۋشىلىق ءتىل مەن جاقتىڭ ارقاسى ەكەن.

كوپ بولدى قويعانىنا ءبىر جان كەلمەي.

 

ءتۇرىمدى جاتقان مىناۋ تۇرسىز كورىپ,

ولگەندە كىم بارادى ماعان ەرىپ.

ەنگەندە جەر قوينىنا ەكى قۇلاش,

جاتارمىن بولسا ەكەن دەپ يمان سەرىك.

 

دوسىنا ايتقان دەيدى اللا ءوزى,

جەتەدى كەلەشەككە كىمنىڭ كوزى

جاتقاندا اقىر جەمدە ءتاۋبا ەتسە,

پەندەمدى جارىلقايمىن دەگەن ءوزى.

 

جاتىرمىن وسى سوزدەن ءۇمىت ەتىپ,

وكىنەم بوسقا كەتكەن ومىرگە ءوتىپ.

قاتامدى كەش, الدىمنان ۇيالتپا دەپ,

تىلەيمىن كوز جۇمعانشا ۋاقىت جەتىپ

 

بەلگىلى جاستىق شاعىم بارىڭە ايان.

ەتەيىن ونىڭ نەسىن سىزگە بايان.

وتەرىن دۇنيەنىڭ ەرتە ويلاماي,

جاتىرمىن ۋاقىتقا كەپ قىسىلتاياڭ.

 

دۇنيەنى الشاڭ باسقان قايران كۇنىم,

جاساعان بەرىپ ەدى ونەر-ءبىلىم.

سۇراقتان سۇرىندىرمەي وتكىزەرمە,

سايراعان بۇلبۇل قۇستاي قىزىل ءتىلىم.

 

دەگەنمەن كەلەدى ءتىلىم راببىم اللا,

مۇحاممەد پايعامبارىم راسۋل اللا.

جاڭىلماي قىرىق پارىزدان امان وتسەم,

بولار ەد بىتپەس ازىق ۇزاق جولعا.

 

سىنىق كوڭىل قايعى تارتتى جۇدەپ, ارىپ.

جالعاننان كوردىم قىزىق جۇرەك جارىپ.

وزگەدەن تابيعاتى بولەك شىعىپ,

جارالعان بۇل دۇنيەگە مەن ءبىر عارىپ.

 

بىرەۋدىڭ مال مەن باسى داۋلەتى كوپ.

داۋلەتكە سول جانداردىڭ كوڭىلى توق.

قايعىمەن مەن جاتىرمىن ءحالىم مۇشكىل.

كۇڭىرەنىپ ۇيدە جالعىز, جولداسىم جوق.

 

دۇنيەنىڭ اۋرەسىنە جولىققاندا,

جان شىركىن, قايعى-دەرتكە مولىققاندا.

جان جولداس بولار ما ەدى جانى اشيتىن,

تانىڭنەن قۋات كەتىپ تورىققاندا.

 

ادامنىڭ بولسا ەگەر جان جولداسى,

ەمەس پە مۇڭلى عارىپ عازيز باسى.

قايعىسى, قاسىرەتى كىمگە باتار,

كول بولىپ اقسا داعى كوزدىڭ جاسى.

 

حالىققا ءدارىس ايتقان يمام ەدىڭ,

ناماز بەن ورازا قيناپ ەدىڭ.

جولىنا سەرىلىكتىڭ ءتۇسىپ كەتىپ,

قىزىعىن سۇم دۇنيەنىڭ قيماپ ەدىم.

 

اللادان ءمىناجات كوپ تىلەكتەرىم,

عيبادات ساۋشىلىقتا ءبىر ەتپەدىم.

جاتقاندا كوزىم ءتىرى, ءسىز كەلگەندە,

قوزعالدى ءبارى قوپسىپ جۇرەكتەرىم

 

قۇداي-اۋ مەنى يسلام دىنىندە قىل,

يدايات پايعامباردىڭ جولىندا قىل.

ءبىر اللا اماناتىن بەرگەن شاقتا,

ءتانىمدى ىزىلەردىڭ قولىندا قىل.

 

وڭ جاققا تازا ارۋلاپ سالعان شاقتا,

ورنىمدى ساحيلاردىڭ ۇيىندە قىل,

ىشىندە قۇرعاق جەردە ءتىل قاتىسىپ,

سولاردىڭ قيامەتتە سوڭىندا قىل.

 

كەۋدەدەن جان اۋىرىپ تايعانىندا,

يشارات, يمان ءجۇزدى وڭىمدە قىل.

جالعاننىڭ ماعان ەتكەن تاربيەسىن,

بۇيرىقتى شاپاعاتتىڭ جونىندە قىل.

 

ەي, اللا بۇل تىلەۋىم قابىل الىپ,

ساۋابىن ءفاني جالعان تاتقانداي قىل.

ەل كەتىپ جالعىز ءوزىم قالعان شاقتا,

اق قانات پەرىشتەلەر كەلگەندەي قىل.

 

جاتىرمىن وسىلايشا كوكتەن تىلەپ,

بولار دەپ الدىم قانداي قورقىپ جۇرەك.

ارماندا فانيدەگى وكىنبەس ەم,

جاساعان باقي جاقتان بەرسە تىلەك.

 

قۇدايدان قورىققان ادام جىلاي بەرەر.

جالىنىپ جالبارىنىپ سۇراي بەرەر

عاراسات مايدانىنا ايداعاندا,

كىم جاقسى, كىم جامانىن قۇداي بىلەر.

 

ريزالىق ايتساق سىزگە ناۋان حازىرەت,

فانيدەن باقي جاققا تۇزەلدى بەت.

مۇڭ ايتىپ قيامەتتىك كوڭىلدى اشتىم,

ويلاپ ەم ءسىزدى كورمەي وتەم بە دەپ.

 

باقۇل بول, مەن باقۇلمىن, شىن نيەتپەن.

الماڭىز كوڭىلىڭىزگە قاتەمدى وتكەن.

پايداسىز جەلىككەندىك جەتەگىمەن,

بار شىعار ايتقان ءسوزىم تالاي وكتەم.

 

بۇل تاعدىر قالار دەيسىڭ كىمگە كەلمەي,

دۇنيەگە سىيار ما ادام تۇرسا ولمەي.

و اللا, جارىلقاعىن مۇسىلماندى,

بار شىعار تالاي مۇڭلىق وتكەن مەندەي.

 

حال بىلە كوپ راحمەت كەلگەنىڭە,

باس سۇعىپ, باسپاناما ەنگەنىڭە

تاراتتىم كوڭىلدەگى بار قۇسانى,

ەندى كوپ وكىنبەيمىن ولگەنىمە.

 

قورقىنىش كوڭىلىمە جاتىر ەنىپ,

باتپانداپ بارعان سايىن اۋرۋ جەڭىپ.

ۇستاڭىز سۇيەگىمدى ءتىرى وتىرساڭ,

شاقىرۋ حابار كۇتپەي ءوزىڭ كەلىپ.

 

ال, ەندى وسىمەنەن دەمالايىن,

جۇرەكتەن ايتتىم سىردىڭ ءبىرتالايىن.

باعىشتاپ, اتىمدى اتاپ, رۋحىما

دۇعاڭنان تاستاماڭىز جۇما سايىن.

 

قوش تاقسىر, شىن دۇنيەگە تۇزەلدى بەت,

ەتىڭىز قۇران-قاتىم باسىما كەپ

دۇعاڭىز قابىل بولار ينشاللا,

قول جايسا پەرىشتەلەر ءاۋمين دەپ.