تۇركىستان وبلىسىندا بارلىق اۋداندار جاپپاي بەتپەردە تىگۋدى قولعا الىپ, تۇرعىندارىنىڭ سۇرانىسىن تولىق قامتاماسىز ەتپەك. ال سايرام اۋدانىنداعى «التىن ادام» جاۋاپكەرشىلىگى شەكتەۋلى سەرىكتەستىگى بەتپەردەنىڭ بىرنەشە ءتۇرىن تىگۋگە ءىرى كولەمدە تاپسىرىس الدى. مۇندا 80-نەن اساتىن جۇمىسشى كۇنىنە 30 مىڭ ماسكا تىگۋدى جوسپارلاپ وتىر.
اۋدانعا ساپارىندا وبلىس اكىمى ومىرزاق شوكەەۆ تسەحتىڭ جۇمىس بارىسىمەن تانىستى. سەرىكتەستىكتىڭ قاجەتتىلىككە قاراي ماسكا مولشەرىن كوبەيتىپ تىگۋگە مۇمكىندىگى بار. سونىمەن قاتار, ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى اياسىندا, اتاۋلى الەۋمەتتىك كومەك الۋشىلاردىڭ اراسىندا قارجىلاي كومەك العان 65 تىگىنشى كۇنىنە 5500 دانا مەديتسينالىق ماسكا تىگۋ جۇمىستارىمەن اينالىسۋدا. اۋدان اكىمى ۇلاسبەك سادىبەكوۆ قازىرگى تاڭدا 10 مىڭعا جۋىق از قامتاماسىز ەتىلگەن ازاماتتاردى تەگىن مەديتسينالىق ماسكامەن قامتۋ شارالارى جۇزەگە اسىرىلىپ جاتقانىن جەتكىزدى.
قاۋىپتى دەرتتى انىقتاپ, ونىمەن كۇرەسۋگە دارىگەرلەر دە دايىن. وبلىس اكىمى بىرنەشە رەت دايىندىق كۋرستارىنان وتكەن مەديتسينا قىزمەتكەرلەرىمەن كەزدەستى. جاقىن كۇندەرى پايدالانۋعا بەرىلەتىن جاڭا ەمحانانى ارالاپ, دياگنوستيكا قورى مەن وقشاۋلاۋ, رەزەرۆتى توسەك-ورىنداردى تەكسەردى. ەمدەۋ مەكەمەسى جوسپار بويىنشا كۇنىنە 500 كەلۋشىگە ەسەپتەلگەن. ايتقان جەردەن اۋلاق, قاجەتتىلىك تۋىنداعان جاعدايدا جاڭا عيمارات 100 توسەك - ورىندىق وبسەرۆاتسيالىق گوسپيتال رەتىندە قىزمەت كورسەتەدى. مەديتسينالىق مەكەمە ءتيىستى ءدارى-دارمەكتەرمەن تولىق قامتاماسىز ەتىلگەن, مامانداردان 4 بريگادا جاساقتالعان. سونداي-اق اۋداندىق اۋرۋحانانىڭ دارىگەرلەرى اقسۋكەنت اۋىلىندا ورنالاسقان «مانكەنت» تەمىرجول ستانساسىندا دا كۇندىز-ءتۇنى قىزمەت اتقارۋدا.
تۇركىستان وبلىسى