تۇركىستان وبلىسى اكىمدىگى تاراپىنان وبلىس اۋماعىندا ينفەكتسيانىڭ تارالۋىنا جول بەرمەۋ بويىنشا بارلىق قاجەتتى مەديتسينالىق, پروفيلاكتيكالىق جانە ۇيىمداستىرۋ شارالارى قابىلداندى. ارنايى سيتۋاتسيالىق ورتالىق قۇرىلىپ, شتاب ءوز جۇمىسىن باستادى. بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە وبلىس اكىمىنىڭ ورىنباسارى ساكەن قالقامانوۆ مالىمدەدى.
«سانيتارلىق قاۋىپسىزدىك شارالارىن كۇشەيتە وتىرىپ, ءىرى ساۋدا ورىندارىنىڭ جۇمىس كەستەسى ساعات 10:00 مەن كەشكى 18:00 ارالىعىندا بولادى. نان-بولكە جانە كونديتەرلىك ونىمدەر تەك وراۋلى كۇيدە ساتىلۋى قاجەت. كيىم-كەشەك بازارلارى ساعات 11.00-17:00 ارالىعىندا جۇمىس ىستەيدى. ءدامحانالار مەن مەيرامحانالاردىڭ جۇمىس ۋاقىتى كەشكى 22:00-گە دەيىن شەكتەلىپ, كەلۋشىلەر سانى 50 ادامنان اسپاۋى قاجەت. سپورتتىق ءىس-شارالار كورەرمەنسىز وتەدى. اۋقىمدى وتباسىلىق سالتاناتتى ءىس-شارالار مەن ەسكە الۋ سالتتارىن وتكىزۋگە تىيىم سالىنادى. ساۋدا ورتالىقتارى, كينوتەاتر, تەاتر, كورمە, فيتنەس-ورتالىقتار مەن جاتتىعۋ زالدارى, تۇنگى كلۋبتار جانە ادام كوپ جينالاتىن باسقا دا ويىن-ساۋىق ورىندارىنىڭ قىزمەتى توقتاتىلادى» دەدى ساكەن امانگەلدى ۇلى.
سونىمەن قاتار وبلىستا مەكتەپتەن تىس قوسىمشا ءبىلىم بەرۋ نىساندارى, اۋلا كلۋبتارى, ۇيىرمەلەر, سەكتسيالار, كومپيۋتەرلىك كلۋبتار جابىلادى. قوعامدىق ورىندار مەن كولىكتەردە سانيتارلىق ءىس-شارالار تۇراقتى جۇرگىزىلەدى. بارلىق ەمدەۋ جانە مەديتسينالىق-الەۋمەتتىك مەكەمەلەر, قارتتار مەن مۇگەدەكتەرگە ارنالعان ينتەرناتتار, بالالار ۇيلەرىنە كەلۋگە تىيىم سالىنا وتىرىپ, كارانتينگە جابىلادى.
سونداي-اق بريفينگتە وبلىس اكىمىنىڭ ورىنباسارى ۇلان تاجىباەۆ وبلىستىق اكىمدىكتىڭ رەسمي سايتى جانىنان اقپاراتتاندىرۋ پاراقشاسى اشىلعانىن ءمالىم ەتتى. وندا كوروناۆيرۋستان ساقتانۋ جولدارى بويىنشا كەڭەستەر, قولعا الىنعان بارلىق شارا جانە رەسمي اقپاراتتار سالىناتىن بولادى. سونىمەن قاتار ساۋدا ورىندارىنىڭ جۇمىس ىستەۋ كەستەلەرى جاريالانادى.
تۇركىستان وبلىسى