مەملەكەت باسشىسى قاسىم-جومارت توقاەۆ حالىققا ۇندەۋ جاريالاپ, ەلدە العاش رەت ەنگىزىلىپ وتىرعان توتەنشە جاعدايدىڭ ءجونىن ەگجەي-تەگجەيلى ءتۇسىندىرىپ بەردى. قازاقستاندا ءبىر ايعا جۋىق مەرزىمدە سانيتارلىق-ەپيدەميالىق شارالار كۇشەيتىلىپ, قاۋىپسىزدىككە باسىمدىق بەرىلەدى. بۇل – ەڭ اۋەلى حالىقتىڭ اماندىعى ءۇشىن قابىلدانعان شەشىم ەكەنى انىق.
قازىر بۇكىل دۇنيە دۇرلىگىپ, جەر-جاھان جابىرقاپ تۇر. الەمنىڭ دامىعان ەلدەرىنىڭ ءوزى احۋالدى جەتكىلىكتى باعامداي الماي, ابدىراپ قالعان جايى بار. الپاۋىت مەملەكەتتەر پاندەميالىق ىندەتتىڭ الدىندا دارمەنسىز. كوروناۆيرۋس بۇگىندە 158 ەلدەن تابىلىپ, 170 مىڭنان استام ادامعا جۇققان. وكىنىشكە قاراي قايتىس بولعاندار سانى 7 مىڭعا جاقىنداپ قالدى. اسىرەسە تالاي وركەنيەتتىڭ تال بەسىگى سانالعان يتاليا مەن يران قاۋىپ وشاعىنا اينالعان. فرانتسيا, گەرمانيا, يسپانيا سەكىلدى ەلدەردە دە ناۋقاستار سانى كۇن ساناپ ارتىپ بارادى.
ىندەتتىڭ ءدال وسىلاي جەدەل تاراۋى الەمدىك ەكونوميكاعا دا زور سوققى بولىپ ءتيدى. پاندەميا سالدارىنان جەر-جاھاننىڭ ءتۋريزمى توقىراپ, شارتاراپتى شارلايتىن جيھانكەزدەر سانى كۇرت ازايدى. ءتىپتى, يسلام الەمىنىڭ قاسيەتتى مەكەنى مەككەدەگى قاعبا دا ءتاۋ ەتۋشىلەرگە ەسىگىن جاپتى. بۇعان دەيىن يۋ-قيۋ بولىپ جاتاتىن تاريحي مەكەندەر بۇگىندە مۇلگىگەن تىنىشتىققا ورانعان. «جاۋ جاعادان العاندا, ءبورى ەتەكتەن» دەگەندەي, الەم كوروناۆيرۋستان ەنتىگىپ تۇرعاندا مۇناي باعاسى دا قۇلدىرادى. بۇل دا الەمدىك ەكونوميكاعا قوسىمشا سوققى بولدى. تەڭگەمىزدىڭ قۇلدىراپ, دوللاردىڭ ءوسۋى دە جاعدايدى كۇردەلەندىرە تۇسكەنى بەلگىلى.
ەلىمىزدىڭ نەگىزىنەن سىرتتان كەلەتىن تاۋارلارعا تاۋەلدى ەكەنى جاسىرىن ەمەس. اسىرەسە ءدارى-دارمەكتى شەتەلدەن ەكسپورتتايمىز. ءتىپتى, بەتكە تاعاتىن ماسكا دا جەتكىلىكتى بولماي شىقتى. بۇل ورايدا ءار قيىندىق ءبىر مۇمكىندىكتىڭ باستاۋى ەكەنىن ۇمىتپايىق. وسى ءساتتى ۇتىمدى پايدالانىپ, ەلدەگى شاعىن جانە ورتا بيزنەستى, كاسىپكەرلىكتى, اسىرەسە فارماتسەۆتيكا سالاسىن دامىتۋدىڭ, سول ارقىلى ۇلتتىق ەكونوميكانى وركەندەتۋدىڭ ءساتى كەلىپ تۇرعان سياقتى. ءبىر ايتا كەتەرلىك جايت, وسى دۇربەلەڭدى پايدالانىپ, قولدان قىمباتشىلىق تۋدىرىپ, باعانى شارىقتاتىپ جىبەرەتىندەرگە شارا قولدانۋ قاجەت.
ارينە مۇندايدا بەيعامدىققا سالىنباي, ۇرەيگە بوي الدىرماي, پراگماتيكالىق شەشىم قابىلداۋ ناتيجەسىن بەرەدى. «ساقتىقتا قورلىق جوق» دەگەن. دۇنيەجۇزىلىك دەنساۋلىق ساقتاۋ ۇيىمى ەسكەرتكەندەي, ۆيرۋستىڭ تارالۋىن كۇتپەي ەرتە ارەكەت ەتكەن ءجون. وسى ورايدا پرەزيدەنتتىڭ ەلىمىزدە توتەنشە جاعداي جاريالاۋ جونىندەگى جارلىعى – قۇپتارلىق شەشىم. ويتكەنى ءدال قازىرگى ساتتە ءار ساعاتتىڭ قىمبات ەكەنىن يتاليا مەن وڭتۇستىك كورەياداعى احۋال كورسەتىپ بەردى. ماسەلەن, اپەننين تۇبەگىندە ىندەت العاش تىركەلگەندە حالىق نەمقۇرايلى قاراعانىن بۇقارالىق اقپارات قۇرالدارىنان ەستىپ وتىردىق. بىراق پاندەميا كۇش بەرمەي كەتكەندە قابىلدانعان شەشىمدەر كەش جاسالعانىن انىق اڭعارتتى. ونىڭ ۇستىنە ۇرەيگە بوي الدىرعان تۇرعىندار بەي-بەرەكەت كوشىپ, دۇكەندەرگە ۇزىن-سونار كەزەككە تۇرىپ, ابدەن ابدىراعان. مۇنداي دۇرلىگۋ ۇرەيدى قوزدىرىپ, بايسالدى ارەكەت جاساۋعا كەدەرگى كەلتىرەتىنىنە تاعى ءبىر مارتە كوزىمىز جەتتى.
كوروناۆيرۋستان تۋعان الەمدىك پاندەميا –حالىقارالىق قوعامداستىققا عانا ەمەس, قازاقستان ءۇشىن دە ۇلكەن سىناق. الايدا پرەزيدەنت ايتىپ وتكەندەي, ەلىمىز مۇنداي زاۋالدىڭ تالايىن باستان وتكەرگەن. نامىستان جارالعان, بەرەكە-بىرلىكتى تۋ ەتكەن حالقىمىز قابىرعا قايىستىرار قيىندىقتارعا دا مويىماي, بۇدان دا زور الاپات اپاتتاردان امان شىققان. ەلىمىز بۇل جولى دا توتەننەن كەلگەن قيىندىقتى جەڭىپ شىعاتىنىنا ەش كۇمان جوق.
ءار نارسەنىڭ ءبىر قايىرى بار دەگەن, وسىندايدا وقشاۋلانۋ قىم-قۋىت تىرلىكتەن قول بوساتىپ, وتباسىمىزعا, ەت جاقىندارىمىزعا كوڭىل بولۋگە مۇمكىندىك بەرەدى. دۇربەلەڭ دۇنيەدە دۇرمەككە ىلەسىپ الىپ, ءوزىمىزدىڭ ىشكى الەمىمىزدىڭ تەرەڭ تۇڭعيىعىنا ۇڭىلۋگە, جۇرەگىمىزدىڭ ءۇنىن تىڭداۋعا, وتباسىمىز بەن ەت باۋىر جاقىندارىمىزعا جەتە كوڭىل بولۋگە, بالالارىمىزبەن ءبىر داستارقان باسىندا اس ءىشىپ, اڭگىمەلەسۋگە, كىتاپ وقۋعا, رۋحاني كەمەلدەنۋ جولى مەن كىسىلىكتىڭ كىلتىن ىزدەۋگە ۋاقىت تابا الماي, ايتەۋىر سابىلىپ, تويدان تويعا شابىلىپ, بىتپەيتىن جيىندارمەن سارسىلىپ جۇرگەنىمىز جاسىرىن ەمەس. اسىرەسە كەزىندە اباي ايتقان, الايدا ءالى كۇنگە ارىلا الماي جۇرگەن «وسەك, وتىرىك, ماقتانشاق, ەرىنشەك, بەكەر مال شاشپاق» سياقتى جات قىلىقتاردان قۇتىلىپ, ارىلا تۇسكەن ءجون. تويدى تىيىپ, توتەنشە جاعدايعا سايكەس, مۇمكىندىگىنشە ادام كوپ جەرگە بارماۋ كەرەك. وسىلاي قازاقتىڭ تويى دا داراقىلىقتان ادا بولىپ, پراگماتيكالىق جۇيەگە تۇسەر.
ەلىمىزدە انىقتالعان كوروناۆيرۋسپەن ەڭ العاش كۇرەسەتىندەر دارىگەرلەر ەكەنى بەلگىلى. ويتكەنى ىندەتتىڭ تارالماۋىنا ءبىرىنشى بولىپ جاۋاپ بەرەتىن وسى اق حالاتتى ابزال جاندار. ەندەشە, ۆيرۋسپەن كۇرەسىپ جۇرگەن دارىگەرلەرگە قولداۋ كورسەتكەنىمىز ءجون. ۇلت رەتىندە يممۋنيتەتىمىز سىنالار وسى ساتتە قالام ۇستاعان قاۋىمعا دا ۇلكەن جاۋاپكەرشىلىك جۇكتەلەدى. ساناعا سىڭەتىن سانسىز سىپسىڭ ءسوز بەن قيسىنسىز قاۋەسەت ۆيرۋستان دا قاۋىپتى ەكەنىن ۇمىتپايىق. جۇرتتىڭ جۇدىرىقتاي جۇمىلىپ, تەكسەرىلمەگەن مالىمەتتى تاراتپاي, تەك رەسمي جاڭالىققا يەك ارتقانى ابزال. سەنىمدى اقپارات كوزدەرىنە عانا جۇگىنىپ, ارانداتۋشىلىققا بوي الدىرماعان ءجون. ساقتىق شارالارىن جاسايىق, سابىرلى قالپىمىزدى ساقتايىق!
پرەزيدەنتىمىز ايتقانداي, ءبىزدىڭ بولاشاعىمىز – ءبىزدىڭ عانا قولىمىزدا!