ۇلى جەڭىسكە – 75 جىل. اقمولا وبلىسىنان قان مايدانعا 83142 ازامات اتتانعان, سونىڭ تەڭ جارتىسى ەلىنە ورالمادى. بۇگىنگى كۇنى كوزى ءتىرى 38 سوعىس ارداگەرى بار.
مايدان دالاسىندا وق-ءدارىنىڭ ءيىسىن يىسكەمەسە دە, تىلداعى تاقسىرەتتى تارتقاندار از ەمەس. سونىڭ ءبىرى ۆالەنتينا ۆيلحوۆچەنكو. سوعىس باستالعان كەزدە نەبارى 7 جاسار ءبۇلدىرشىن بولاتىن. ءتىرى قالۋ ءۇشىن سول كەزدەن باستاپ تىربانىپ تىرشىلىك ەتتى.
اكەسى مايدانعا اتتانعاندا 7 جاسار ۆالەنتينا اناسىمەن جانە ەكى باۋىرىمەن قالدى. تۋعان جەرى ۋكراينانىڭ دنەپروپەتروۆسك قالاسىنا جاۋ جاقىنداپ كەلگەندە قانشاما قيىنشىلىقتى باسىنان كەشىردى. اشتىقتى دا كوردى, باسقىنشى جاۋدان باس ساۋعالاپ 200 شاقىرىم جەردى جاياۋ جۇرگەنى ەستە. اقىرى اتا-اناسىنىڭ تۋعان جەرى ياسينوۆاتكا سەلوسىنا قونىس اۋدارىپ, 7 جىل سوندا تۇراقتادى.
– ەسكە الۋ وتە قيىن. قاۋىپ تونگەن كەز ەدى. كەز-كەلگەن مينۋتتا جاۋ قولىنان ء ولىپ كەتۋىمىز مۇمكىن ەدى. سوعىس اياقتالعانشا كولحوزدا تۇردىق. بارلىق جۇمىس ايەل ادامدار مەن بالالاردىڭ موينىندا بولدى. 7-8 جاسار بالا بولساق تا, كۇنى-ءتۇنى جۇمىس ىستەدىك. استىق جينايتىن تەحنيكاعا ەكى-ەكى بالادان جارماسىپ, سونى اينالدىراتىنبىز, – دەيدى تىل ارداگەرى.
اۋىر جۇمىس كەزىندە تالاي ءولىم اۋزىنان قالىپتى. تىڭ يگەرۋ جىلدارىندا جاستار جاپپاي قازاقستانعا كەلىپ جاتتى. ۆالەنتينا يۆانوۆنا دا 1961 جىلى كوشپەن بىرگە تسەلينوگراد قالاسىنا قونىس اۋدارعان. وسى جەردە ومىرلىك جارىن كەزدەستىرىپ, وتباسىن قۇرادى. اراعا ون جىل سالىپ, وتاعاسىن قىزمەت بابىمەن كوكشەتاۋ وبلىسىنا اۋىستىرادى. تىل ارداگەرى سول كەزدە قالالىق اۋرۋحاناعا دارىگەر بولىپ ورنالاسادى. وسى جەردەن زەينەتكە شىعادى. ۇل مەن قىز تاربيەلەپ ءوسىردى. ۇلى انا جولىن قۋىپ دارىگەر بولىپ ەڭبەك ەتۋدە.
ۆالەنتينا يۆانوۆنا سەمسەرلەسۋ سپورت ءتۇرى بويىنشا كسرو-نىڭ سپورت شەبەرى. دنەپروپەتروۆسكىدە مەديتسينالىق ينستيتۋتتا وقىپ ءجۇرىپ-اق, سەمسەرلەسۋ ارقىلى تانىلىپ, تالاي جارىستاردا چەمپيون اتانعان ەكەن. كەيىن ماماندىعى بويىنشا سەمسەرلەسۋشى سپورتشىلارعا دارىگەرلىك كومەك كورسەتۋمەن اينالىسقان. بۇگىندە ارداگەر وتكەنىن جىلۋلىقپەن ەسكە الىپ, بولاشاعىنا ەش الاڭسىز قارايدى.
ۇلى جەڭىس مەرەكەسى قارساڭىندا تىل ارداگەرى تولعاناتىن شاق كوپ. وتكەن ءومىر ويعا ورالادى. تىرشىلىگىنىڭ ءتىنىن ۇزارتقان ەڭبەك دەپ توپشىلايدى. جاس تولقىنمەن جۇزدەسكەن ساتتە ادالدان تاپقان نان ءتاتتى ەكەندىگىن ايتۋدان جالىققان ەمەس.