تۇركىستاندا ۇلىستىڭ ۇلى كۇنىنە ارنالعان مەرەكەلىك ءىس-شارالار 14-ناۋرىز كۇنى باستالادى. كيەلى مەكەندە «ەتنواۋىل» بوي كوتەرىپ, ناۋرىز مەيرامىن 12 كۇن بويى تويلاۋ جوسپارلانۋدا.
بۇل تۋرالى وبلىس اكىمى ومىرزاق شوكەەۆتىڭ توراعالىق ەتۋىمەن وتكەن اپتالىق لەزدەمە وتىرىسىندا ايتىلدى. تۇركىستان تورىندە ازۋلى اقىندار الامان ايتىستا باس قوسادى, ءداستۇرلى ۇلتتىق ويىندار وتەدى. ەلىمىزگە تانىمال جۇلدىزداردىڭ كونتسەرتتىك باعدارلامالارى, سان الۋان بايقاۋلار مەن فەستيۆال, سايىستار ۇيىمداستىرىلماق. ارينە, 12 كۇننىڭ ءاربىرىن تاعىلىمدى دا تانىمدى وتكىزۋ جانە جاس ۇرپاقتىڭ ساناسىنا ۇلتتىق سالت-داستۇرلەردى ءسىڭىرۋ باستى ماقساتتاردىڭ ءبىرى. وسى باعىتتاعى پىكىرلەر ورتاعا سالىندى.
جيىندا, سونداي-اق وبلىستىق اۋىل شارۋاشىلىعى باسقارماسىنىڭ باسشىسى نۇربەك بادىراقوۆ كوكتەمگى دالا جۇمىستارى بويىنشا بايانداما جاساپ, قاجەتتى 37 مىڭ توننا ارزانداتىلعان جانارماي ءبولىنىپ, جەر ايداۋ جۇمىستارى 96% ورىندالعانىن اتاپ ءوتتى. زيانكەستەردەن كەلەتىن قاۋىپتىڭ الدىن الۋ بويىنشا جۇمىستار دا تالقىلاندى. ال تۇركىستان قالاسىنىڭ اكىمى راشيد ايۋپوۆ شاھاردىڭ دامۋ باعىتتارىن باياندادى.
بۇگىندە قالادا اكىمشىلىك-ىسكەرلىك ورتالىق اۋماعىندا 7 قاباتتى 14 تۇرعىن ءۇيدىڭ, 12 قاباتتى 40 تۇرعىن ءۇيدىڭ, ال «باتىس قىتاي – باتىس ەۋروپا» تاسجولىنىڭ بويىندا 7 قاباتتى 10 تۇرعىن ءۇيدىڭ قۇرىلىسى جۇرگىزىلۋدە. بۇعان قوسا, اكىمشىلىك-ىسكەرلىك ورتالىق اۋماعىنان جەكە قۇرىلىس كومپانياسى ءوز قاراجاتى ەسەبىنەن 12 قاباتتى 32 تۇرعىن ءۇيدىڭ قۇرىلىسىن جۇرىزۋدە.