تۇركىستان وبلىستىق كلينيكالىق اۋرۋحاناسىندا 100-گە جۋىق شەتەل ازاماتى ەم قابىلداعان. شەت ءتىلىن مەڭگەرگەن 30-عا جۋىق مامان وزگە مەملەكەتتەردەن كەلگەن ناۋقاستارعا جوعارى دەڭگەيدە قىزمەت كورسەتىپ كەلەدى.
جىل ساناپ مارات پاشيموۆ باسقاراتىن بۇل ەمدەۋ مەكەمەسىنىڭ قىزمەتى رەسەي, قىرعىزستان, تاجىكستان جانە وزبەكستان ەلىنىڭ ازاماتتارى تاراپىنان سۇرانىسقا يە بولۋدا. شەتەلدىكتەر كوبىنەسە جاراقات ءبولىمىنىڭ كومەگىنە جۇگىنەدى ەكەن. كلينيكالىق اۋرۋحانا – وبلىس تۇرعىندارىنا جوعارى مامانداندىرىلعان كومەك كورسەتەتىن وڭىردەگى جەتەكشى مەديتسينالىق ورتالىق. جوعارى بىلىكتى دارىگەرلەر جىل سايىن نەيروحيرۋرگيا, ورتوپەديا, وتا جاساۋ, ساۋلەلىك دياگنوستيكا بويىنشا كلينيكالىق جولدامامەن رەسەي, گەرمانيا, ۋكراينا, ءۇندىستان, وڭتۇستىك كورەيا, يسپانيا جانە يزرايل مەملەكەتتەرىندە بىلىكتىلىك ارتتىرادى. ودان بولەك شەتەلدىك دارىگەرلەر كەلىپ, جەرگىلىكتى ارىپتەستەرىمەن تاجىريبە الماسۋدا.
ايتا كەتەلىك, قازىرگى تاڭدا وبلىستىق كلينيكالىق اۋرۋحاناعا قاراستى 2 ەمحانا جانە 18 بولىمدە 1800-گە جۋىق قىزمەتكەر جۇمىس ىستەيدى. وڭىرگە قاراستى بارلىق اۋدان تۇرعىندارىنا جولداما ارقىلى تەگىن مەديتسينالىق قىزمەتتەر ۇسىنىلادى. شالعاي اۋىلدا تۇراتىن ناۋقاستاردىڭ جاعدايى شۇعىل كومەكتى قاجەت ەتسە, اۋرۋحاناعا سانيتارلىق اۆياتسيا ارقىلى جەتكىزىلەدى.
تۇركىستان وبلىسى