تۇركىستان وبلىسى اكىمى ومىرزاق شوكەەۆتىڭ توراعالىق ەتۋىمەن وتكەن اپتالىق لەزدەمە وتىرىسىندا جاۋاپتى سالا ماماندارى, كۇندەلىكتى مونيتورينگ قورىتىندىسىنا ساي, اۋماققا كەلەتىن قاۋىپ-قاتەر جوقتىعىن ءمالىم ەتتى.
دەگەنمەن, ماماندار شاردارا اۋدانى, سۇتكەنت ەلدى مەكەنىندەگى سىرداريا وزەنى جاعاسىنداعى قورعانىس دامباسى 2017 جىلى وتكەن تاسقىن سۋدان شايىلعانىنان الاڭداۋشىلىق ءبىلدىردى. وبلىستاعى سۋ تاسقىنىنىڭ الدىن الۋ جانە ونىڭ كەلەڭسىز سالدارىن ازايتۋ ماقساتىندا جاسالىپ جاتقان جۇمىستار جانە وزگە دە ماسەلەلەر تالقىلانعان جيىندا قاۋىپتىڭ الدىن الۋ ءۇشىن دامبانى قالپىنا كەلتىرۋ قاجەتتىگى ايتىلدى. ماسەلەنىڭ ءمان-جايىن انىقتاۋ ءۇشىن كوميسسيا قۇرىلاتىن بولدى. سونداي-اق وبلىس اكىمى جاۋاپتى سالا جەتەكشىلەرىنە سۋارمالى سۋ تاپشىلىعىنىڭ الدىن الۋدى دا تاپسىردى.