تۇركىستان وبلىسى, بايدىبەك اۋدانىنداعى 3 اۋىلدىق وكرۋگتە جاس ماماندار مەن از قامتىلعان كوپبالالى وتباسىلارعا ارناپ ەكى قاباتتى 10 پاتەرلى 3 تۇرعىن ءۇي قۇرىلىسى جۇرگىزىلگەن بولاتىن. كۇنى كەشە مىڭبۇلاق اۋىلدىق وكرۋگىنىڭ ورتالىعىندا قۇرىلىسى اياقتالعان 10 پاتەرلى 2 قاباتتى تۇرعىن ءۇي پايدالانۋعا بەرىلدى.
وسى جىلدىڭ ىشىندە قالعان اۋىلدىق وكرۋگتەردەگى 2 تۇرعىن ۇيگە 20 وتباسى قونىستانادى دەپ جوسپارلانىپ وتىر. ال جاڭادان پايدالانۋعا بەرىلگەن تۇرعىن ۇيگە جاس مەملەكەتتىك قىزمەتكەرلەر مەن ءۇيى اپاتتى جاعدايداعى جانە تۇرمىسى تومەن كوپبالالى وتباسىلار قونىستاندى. سالتاناتتى شاراعا قاتىسقان بايدىبەك اۋدانىنىڭ اكىمى باقىتبەك تاناگوزوۆ ءۇي كەزەگىندە تۇرعان ازاماتتارعا جاڭا پاتەر كىلتتەرىن تاپسىرىپ, جۇرەكجاردى تىلەگىن جەتكىزدى. پايدالانۋعا بەرىلگەن تۇرعىن ۇيدە قونىستانۋشىلارعا بارلىق جاعداي جاسالعان.