تۇركىستان وبلىسىندا وتكەن جىلدىڭ 1 قاڭتارىنان 59 قىزمەت ءتۇرى بويىنشا تابيعي مونوپوليا سۋبەكتىلەرىنىڭ تاريفتەرى تومەندەتىلگەن بولاتىن. ناتيجەسىندە تۇرعىنداردىڭ كوممۋنالدىق قىزمەتكە تولەيتىن قاراجاتىن ۇنەمدەۋ شامامەن 3 ملرد تەڭگەدەن اسقان. بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە تابيعي مونوپوليالاردى رەتتەۋ كوميتەتىنىڭ تۇركىستان وبلىسى بويىنشا دەپارتامەنتى باسشىسىنىڭ مىندەتىن اتقارۋشى قىمبات بەيسەنوۆ مالىمدەدى.
بيىلعى 1 قاڭتارداعى جاعداي بويىنشا وبلىستا 116 قىزمەت تۇرىمەن اينالىساتىن 93 تابيعي مونوپوليا سۋبەكتىسى ەنگىزىلگەن. «بۇگىنگى تاڭدا وبلىس بويىنشا جىلۋمەن جابدىقتاۋشى 6 مەملەكەتتىك كوممۋنالدى كاسىپورىن جۇمىس اتقارۋدا. ءبىرىنشى قاڭتاردان باستاپ جىلۋمەن جابدىقتاۋ تاريفتەرى ورتا ەسەپپەن 3-17 % ارالىعىندا تومەندەدى. سۋمەن جابدىقتاۋ تاريفتەرى ورتا ەسەپپەن وبلىستا 0,1-2% ارزانداعان. ال ەلەكتر ەنەرگياسىمەن جابدىقتاۋ قىزمەتى بويىنشا 2020 جىلدىڭ 1 قاڭتارىنان باستاپ تاسىمالداۋ ءتاريفى 6,64 تەڭگەدەن 7 تەڭگەگە كوتەرىلدى. تابيعي گازبەن جابدىقتاۋ قىزمەتى بويىنشا تاسىمالداۋ ءتاريفى وزگەرىسسىز قالدىرىلدى» دەدى قىمبات بەيسەنوۆ.
سونداي-اق باسشىنىڭ مىندەتىن اتقارۋشى تابيعي مونوپوليا سۋبەكتىلەرىنىڭ الدىڭعى جىلعى تاريفتىك سمەتالارىنىڭ ورىندالۋى ەسەبىنە جاسالعان تالداۋلاردىڭ قورىتىندىسىمەن جالپى سومماسى 1 ملرد 292 ملن 948,4 مىڭ تەڭگە كولەمىندە وتەمدىك تاريفتەر بەكىتىلىپ, حالىققا تومەندەتىلگەن تاريفپەن قايتارىلعانىن ءمالىم ەتتى.
تۇركىستان وبلىسى