تۇركىستان وبلىسى سايرام اۋدانىنداعى اقسۋكەنت اۋىلدىق وكرۋگىندە ءسۇت ونىمدەرىن وڭدەيتىن زاۋىت اشىلدى. وڭىرلەر كاسىپكەرلىگىن قولداۋ كارتاسى اياسىندا ىسكە قوسىلعان «AYKAN» جشس ء–ىنىڭ ءوندىرىس ورنىندا تاۋلىگىنە 100 توننا ءسۇت وڭدەلەدى.
وڭدەۋ ونەركاسىبىنە «بيزنەستىڭ جول كارتاسى – 2020» باعدارلاماسى اياسىندا 100 ملن تەڭگە جانە 24 ملن تەڭگە كولەمىندە ينۆەستيتسيالىق سۋبسيديا رەتىندە قولداۋ كورسەتىلگەن. تۇراقتى جۇمىسپەن 80 ادام قامتىلعان زاۋىتتا تۇرىك تەحنولوگياسىمەن ىرىمشىكتىڭ 9 ءتۇرى شىعارىلادى.
سايرام اۋدانىنا جۇمىس ساپارىمەن كەلگەن وبلىس اكىمى ومىرزاق شوكەەۆ زاۋىتتىڭ اشىلۋ سالتاناتىنا قاتىسىپ, وبلىستىق ماڭىزى بار كح-97 «اقسۋ – شىمكەنت» جانە كح-3 «كوكسايەك – اقسۋ – شايان – مىڭبۇلاق» اۆتوموبيل جولدارىنىڭ قايتا قۇرۋ, كۇردەلى جوندەۋ جۇمىستارىمەن تانىستى. اۋدان ورتالىعى اقسۋكەنت ەلدى مەكەنىن رەتكە كەلتىرۋ جۇمىستارىن باعامدادى.
اۋدان اكىمى ۇلاسبەك سادىبەكوۆپەن بىرگە «قامقورلىق» ايماقتىق باعدارلاماسى اياسىندا كومەك العان قاراسۋ اۋىلدىق وكرۋگى تۇرعىنىنىڭ شاڭىراعىندا بولىپ, بۇگىنگى تۇرمىس-تىرشىلىگىن كوردى. سونداي-اق ساپار بارىسىندا وبلىس اكىمى اقسۋكەنت اۋىلدىق وكرۋگىندەگى اۋىسىمىنا 500 ادام قابىلدايتىن اۋداندىق ەمحانا مەن جەدەل جاردەم ستانتسياسىنىڭ قۇرىلىس جۇمىستارىمەن تانىستى. ەمدەۋ مەكەمەسى جاقىن كۇندەرى پايدالانۋعا بەرىلەدى.