تۇركىستان وبلىسىنىڭ كاسىپكەرلەر پالاتاسى وتكەن جىلى 10 ميلليارد تەڭگە سوماسىندا كاسىپكەرلەردىڭ قۇقىقتارى مەن مۇددەلەرىن قورعاعان. پالاتاعا كەلىپ تۇسكەن 560 ءوتىنىشتىڭ 418-ءى وڭ شەشىمىن تاپقان.
«ەڭبەك» باعدارلاماسى اياسىندا وڭىردە 12 579 ادام وقۋدان ءوتىپ, ولاردىڭ 7 933-ءى گرانت يەگەرى اتانعان. قىسقامەرزىمدى وقىتۋ باعىتى بويىنشا 5 466 جۇمىسسىز ازامات 3 ايلىق وقۋ كۋرستارىنان وتكەن. كۋرستى بىتىرگەندەردىڭ 1 477-ءى گرانت (745,8 ملن تەڭگە) يەگەرى اتاندى. سونىمەن قاتار «باستاۋ-بيزنەس» جانە «جاس كاسىپكەر» جوبالارى شەڭبەرىندە 7 113 ادام وقۋدى اياقتاعان. ونىڭ اياسىندا 2,7 ملرد تەڭگە سوماسىنا 401 جوبا ىسكە اسىرىلىپ, 3,2 ملرد تەڭگە سوماسىنا 6 456 تۇلەككە گرانت بەرىلگەن. بيزنەس وكىلدەرىمەن كەزدەسۋدە وسىنداي دەرەكتەردى كەلتىرگەن تۇركىستان وبلىسى كاسىپكەرلەر پالاتاسى ديرەكتورىنىڭ ورىنباسارى ءمادي يبادۋللاەۆ وتكەن جىلى اتقارىلعان جۇمىستارعا كەڭىنەن توقتالدى. كەزدەسۋگە وبلىس اكىمىنىڭ ورىنباسارى م.مىرزاليەۆ, Nur Otan پارتياسى وبلىستىق فيليالى توراعاسىنىڭ ءبىرىنشى ورىنباسارى ب.تاجىباەۆ, سونداي-اق, وڭىرلىك كەڭەستىڭ, ىسكەر ايەلدەر كەڭەسىنىڭ مۇشەلەرى, ەكىنشى دەڭگەيلى بانكتەر, قارجى ينستيتۋتتارى مەن قۇزىرەتتى مەملەكەتتىك ورگانداردىڭ باسشىلارى قاتىستى.
«وزدەرىڭىزگە بەلگىلى, تۇركىستان وبلىسى - قالىپتاسقان وڭ بيزنەس-كليماتى بار شاعىن جانە ورتا كاسىپكەرلىك ءوڭىر. بۇگىنگى تاڭدا, وبلىس شاعىن جانە ورتا بيزنەستىڭ جۇمىس ىستەپ تۇرعان سۋبەكتىلەرىنىڭ سانى بويىنشا كوشباسشى جانە ولاردىڭ سانى وتكەن جىلمەن سالىستىرعاندا 8,5 %-عا ارتقان» دەدى ءمادي يبادۋللاەۆ.
كەزدەسۋ بارىسىندا كاسىپكەرلەر وزدەرىن تولعاندىرىپ جۇرگەن سۇراقتارىنا جاۋاپ الدى. جيىن سوڭىندا كاسىپكەرلەر پالاتاسى مەن Nur Otan پارتياسىنىڭ فيليالى اراسىندا ىنتىماقتاستىق تۋرالى مەموراندۋمعا قول قويىلدى. سونىمەن قاتار تۇركىستان وبلىسىنىڭ كاسىپكەرلىكتى دامىتۋدىڭ 2020 جىلعا ارنالعان ءىس-شارالار جوسپارى بەكىتىلدى.
تۇركىستان وبلىسى