تۇركىستان وبلىسى كەلەس اۋدانىنىڭ جولباسشى اۋىلىندا ەرەكشەلەۋ كىتاپحانا وقىرماندارعا تۇراقتى قىزمەت كورسەتىپ كەلەدى. الاقانداي اۋىلدىڭ رۋحاني ورداسىنا اينالعان كىتاپحانادا 7 مىڭنان استام كىتاپ قورى بار.
قازاق ادەبيەتى, تاريحى جانە عىلىمنىڭ ءتۇرلى سالاسىنا قاتىستى ەڭبەكتەردەن باستاپ, الەمنىڭ كلاسسيك جازۋشىلارىنىڭ شىعارمالارىن دا تابا الاسىز.
ەرەكشەلەۋ دەيتىنىمىز, كىتاپحانانى گۇلبالا سارسەنوۆانىڭ وتباسى ءوز قارجىسىنا سالعان. اۋىلدا بۇعان دەيىن كىتاپحانانىڭ جەكە عيماراتى بولماعان. العاشىندا كلۋبتىڭ ءبىر بۇرىشىن پانالاپ, كەيىن مەكتەپتىڭ تار بولمەسىنە ورنالاسقان. كىتاپحاناشى گۇلبالانىڭ كوشكەن سايىن ب ۇلىنەتىن كىتاپتارعا جانى اشيتىن. جەكە عيمارات جونىندەگى وي دا وسى رۋحاني ازىققا جاناشىرلىقتان تۋىنداسا كەرەك. وتباسىنداعى 5 ۇل-قىزدىڭ الدى ستۋدەنت. ولاردىڭ دا جاعدايىن, ەرتەڭىن ويلاۋ قاجەت. دەگەنمەن وتاعاسى نۇرجان ەكەۋى اقىلداسا كەلىپ, كىتاپحانا سالۋ جونىندە شەشىمگە كەلەدى. «كوپ ويلانباستان كوزدى جۇمدىم دا نەسيە الدىم. جۇبايىم قۇرىلىسشى. ياعني, قۇرىلىسشىلارعا بەرەتىن قارجىنى ۇنەمدەدىك. تەك قانا قۇرىلىس ماتەريالدارىن ساتىپ الدىق. مۇنان گورى وزدەرىڭە «ۆرەميانكا» سالىپ المايسىڭدار ما, دەۋشىلەر دە تابىلدى. ماقساتىمىزدان قايتپادىق. ويتكەنى حالىق رۋحاني باي بولۋى كەرەك», دەيدى گ.سارسەنوۆا سول ءبىر كۇندەردى ەسكە الىپ.
وسىلايشا ماتەريالدىق قۇندىلىقتان گورى رۋحاني جان ازىقتى ارتىق ساناعان قاراپايىم كىتاپحاناشى گ.سارسەنوۆانىڭ وتباسى عيمارات سالۋمەن قاتار, قولدا بار كىتاپ قورىن شاشاۋ شىعارماي ساقتاپ قالدى. بۇگىندە جولباسشى اۋىلىنىڭ عانا ەمەس, توڭىرەگىندەگى بىرنەشە ەلدى مەكەننىڭ تۇرعىندارى وسى جەردە كىتاپ وقىپ, دۇنيەتانىمىن كەڭەيتىپ كەلەدى. اۋىل كىتاپحاناسىنىڭ بۇگىندە 700-دەي تۇراقتى وقىرمانى بار. جىلىنا كىتاپ ىزدەپ 9 مىڭداي ادام كەلەدى ەكەن. سونداي-اق اۋىل كىتاپحاناسى كوپتەگەن مادەني ءىس-شارانىڭ ۇيىتقىسى بولىپ وتىر.
تۇركىستان وبلىسى