ورال قالاسى تۇرعىندارى اراسىندا «تۇماۋ اۋرۋىنان ەكى بالا قازا تاپقانى» جونىندە اقپاراتتاراپ, ەل-جۇرت دۇرلىگىپ قالعان بولاتىن. باتىس قازاقستان وبلىسى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى بۇل اقپاراتتى جوققا شىعاردى.
«باتىس قازاقستان وبلىسىندا تۇماۋ اۋرۋىنىڭ تارالۋ دەڭگەيى تۇراقتى. تۇماۋدىڭ اسقىنعان ءتۇرى تىركەلگەن جوق. احۋال جىلداعى دەڭگەيمەن بىردەي. سوندىقتان وبلىس تۇرعىندارىنا ەشقانداي ۋايىمعا سەبەپ جوق. وبلىستا تۇماۋ, باسقا دا جرۆج اۋرۋلارى بقو تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ ءجىتى قاداعالاۋىندا» دەلىنگەن دەپارتامەنتتىڭ ءباسپاسوز قىزمەتى تاراتقان حابارلامادا.
ەپيدەميالىق ماۋسىم باستالعالى بەرى, ياعني 2019 جىلعى 1 قازاننان باستاپ بيىلعى 6 قاڭتارعا دەيىنگى ارالىقتا باتىس قازاقستان وبلىسىندا ءجىتى رەسپيراتورلىق-ۆيرۋستىق جۇقپانىڭ 7776 وقيعاسى تىركەلدى. اۋىرعانداردىڭ دەنى, ياعني 75,6%-ى – 14 جاسقا دەيىنگى بالالار ەكەن. وسى ارالىقتا 348 پنەۆمونيا وقيعاسى دا تىركەلگەن. بۇلار تۇگەلگە جۋىق (97,7%) – 14 جاسقا دەيىنگى بالالار. ابىروي بولعاندا ادام ءولىمى جوق.
«وبلىس بويىنشا «ۆ» تۇماۋى ۆيرۋسىنىڭ اينالىمى انىقتالدى, تۇماۋدىڭ زەرتحانالىق راستالعان 42 جاعدايى تىركەلدى, 14 جاسقا دەيىنگى اۋىرعان بالالاردىڭ ۇلەس سالماعى 85,7%» دەيدى دەپارتامەنت.
بقو تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى وڭىردەگى ەپيدەميولوگيالىق احۋالدى ءجىتى قاداعالاپ, كۇندەلىكتى مونيتورينگ جۇرگىزىپ وتىر.