ورالدا جاڭا سپورت مەكتەبى اشىلدى

جالپى اۋماعى 9 مىڭ شارشى مەترگە سوزىلىپ جاتقان جاڭا مەكتەپ 250 وقۋشىعا ارنالعان. ال ونىڭ جانىنداعى ينتەرنات 150 بالانى قابىلداي الادى. سپورت مەكتەبىندە بوكسشىلارعا ارنالعان قوس رينگ, پالۋاندارعا ارنالعان 4 كىلەم, اۋىر اتلەتيكا بۇرىشى, ويىن زالى, ترەناجەرلەر بار. عيماراتتىڭ بارلىق كابينەتىندە زاماناۋي جابدىقتار ورناتىلعان.

جاڭا سپورت مەكتەبىنىڭ ەسىگىنە كەرىلگەن ءداستۇرلى لەنتانى قيۋ قۇرمەتى ءوڭىر باسشىسى عالي ەسقاليەۆپەن بىرگە وليمپيادانىڭ قولا جۇلدەگەرى ەكاتەرينا لاريونوۆا مەن سامبودان الەم چەمپيونى نۇربول سەرىكوۆكە بۇيىردى.

حالىقتىڭ دەنساۋلىعى – كەز كەلگەن مەملەكەتتىڭ ەڭ باستى بايلىعى سانالادى. ويتكەنى سپورتپەن اينالىساتىن, سالاۋاتتى ۇرپاقتان ەل دامۋىنا ۇلەس قوساتىن ازاماتتار كوپ شىعادى. سوندىقتان دا سپورتقا قابىلەتتى بالالاردى ەرتەرەك تاۋىپ, ونىڭ جان-جاقتى دامۋىنا جاعداي جاساۋىمىز كەرەك. بولاشاق چەمپيوندار الەمدىك جارىستارعا قاتىسىپ, وتانىمىزدىڭ كوك تۋىن بيىك جەلبىرەتەدى. بۇل مەكتەپتىڭ جانىندا جايلى ينتەرناتى بار. ەندى بولاشاقتا ەل نامىسىن قورعايتىن دارىندى بالالاردى تاۋىپ, وسى جەرگە تارتۋ – باپكەرلەردىڭ مىندەتى. مەملەكەت باسشىسى قاسىم-جومارت توقاەۆ ءار اۋداندا دەنەشىنىقتىرۋ-ساۋىقتىرۋ كەشەندەرىن سالۋ تۋرالى تاپسىرما بەرگەن بولاتىن. بيىل جانىبەك پەن جاڭاقالا اۋداندارىندا سپورت كەشەندەرىنىڭ قۇرىلىسى باستالدى. كەلەسى جىلى تاعى التى اۋداندا قولعا الىنباق, - دەدى ءوز سوزىندە باتىس قازاقستان وبلىسىنىڭ اكىمى عالي ەسقاليەۆ.

جاڭا مەكتەپ سپورتقا باسىمدىق بەرگەنىمەن, بۇل جەردە بالالار تولىققاندى ورتا ءبىلىم الىپ شىعادى. مۇندا شەت تىلدەرى كابينەتى, ەڭبەك ساباعىنا ارنالعان شەبەرحانا, كىتاپحانا قاجەتتى قوندىرعىلارمەن تولىق جابدىقتالعان. سونىڭ ارقاسىندا 7-11 سىنىپ ارالىعىنداعى وقۋشىلار جان-جاقتى ءبىلىم الىپ, ءارى سپورتتىڭ 13 تۇرىمەن الاڭسىز اينالىساتىن بولادى. ايتا كەتەرلىگى, بولاشاق سپورتشىلار ينتەرناتتا تەگىن جاتادى, تاماعى دا, سپورتتىق كيىمدەرى دە مەملەكەت ەسەبىنەن بولادى.  

سپورتقا دارىندى بالالارعا ارنالعان مامانداندىرىلعان وبلىستىق مەكتەپ-ينتەرناتىنىڭ ديرەكتورى اباي باقمانوۆتىڭ ايتۋىنشا, مەكتەپ-ينتەرناتتان سوڭعى 15 جىل ىشىندە تالاي-تالاي حالىقارالىق جانە رەسپۋبليكالىق سپورت جارىستارىندا توپ جارعان جەڭىمپازدار شىققان. بولاشاقتا بۇل كورسەتكىش ودان ءارى كوبەيەتىنىنە سەنىم مول.

باتىس قازاقستان وبلىسى