ورال قالاسىندا «تۇعىرى بيىك تاۋەلسىزدىك!» تاقىرىبىمەن وتكەن VIII «التىن دومبىرا» رەسپۋبليكالىق اقىندار ايتىسىنىڭ باس جۇلدەسىن اقىن رۇستەم قايىرتاي ۇلى جەڭىپ الدى.
ەكى كۇنگە سوزىلعان «التىن دومبىرا» سايىسىنىڭ جەڭىمپازى التىن دومبىراعا قوسا 4 ميلليون تەڭگەنى يەلەندى.
سۋپەرفينالدا رۇستەممەن جەكپە-جەككە شىعىپ, كورەرمەندەردىڭ قولداۋىنا يە بولعان قىزىلوردالىق مۇحتار نيازوۆ ءبىرىنشى جۇلدەنى قاناعات تۇتتى. ايتا كەتەيىك, مۇحتار بۇعان دەيىن «التىن دومبىرا» جۇلدەسىن ەكى مارتە جەڭىپ العان.
جۇلدەلى ەكىنشى ورىن باتىسقازاقستاندىق جانسايا مۋسينا مەن الماتىلىق قازىرەت بەردىحانعا بۇيىردى. قوستانايلىق ايبەك قاليەۆ پەن قاراعاندىلىق ءومىرجان كوپبوسىنوۆ ءۇشىنشى ورىن يەسى اتاندى. اسەم ەرەجەقىزى (نۇر-سۇلتان), قانات مىرزاحان (الماتى), اسپانبەك شۇعاتاەۆ (پاۆلودار) ارنايى جۇلدەگە يە بولدى.
ايتىس مەتسەناتى, «Tas Group» كومپانيالار توبىنىڭ جەتەكشىسى دۋلات تاستەكەەۆ باتىسقازاقستاندىق باۋىرجان شيرمەدين ۇلىنا جالپى قۇنى 2,4 ملن تەڭگەلىك ءبىر جىلدىق ستيپەنديا تاعايىندادى. سونداي-اق كاسىپكەر قاراعاندىلىق ديدار قاميەۆ پەن ورالدىق اقىن, وسى ايتىستى ۇيىمداستىرۋشىلاردىڭ ءبىرى باۋىرجان حاليوللاعا ات مىنگىزدى.