ورال قالاسىندا «تۇعىرى بيىك تاۋەلسىزدىك» دەگەن اتپەن VIII «التىن دومبىرا» رەسپۋبليكالىق ايتىسىنىڭ ىرىكتەۋ كەزەڭى ءوتتى. ايتىستىڭ العاشقى كۇنى ەلىمىزدىڭ ءار وڭىرىنەن كەلگەن 20 اقىن ون جۇپ بولىپ ايتىستى.
«التىن دومبىرا» سايىسى بىلتىرعى VII «التىن دومبىرانىڭ» يەسى جانسايا مۋسينانىڭ قۇرمەتىنە ورال قالاسىندا تۇڭعىش رەت ءوتىپ وتىر. «Nur Otan» پارتياسىنىڭ قولداۋىمەن, قازاقستان رەسپۋبليكاسى مادەنيەت جانە سپورت مينيسترلىگى جانە باتىس قازاقستان وبلىسى اكىمدىگىنىڭ ۇيىمداستىرۋىمەن قولعا الىنعان اقىندار ايتىسى ەكى كۇنگە, 16-17 جەلتوقسانعا جوسپارلانعان.
ايتا كەتەيىك, بۇل جولعى «التىن دومبىرا» سايىسىنىڭ ۇيىمداستىرىلۋى ەرەكشە بولدى. ءاسيا بەركەنوۆا, ءالپيا ورمانشينا, قانىشا رايىسوۆا, داريعا مۇشتانوۆا, قۋانىش ماقسۇتوۆ, امانجول التاەۆ ت.ب. ايتىس ارداگەرلەرى دە شاقىرىلىپ, ەكى كۇن بويى ايتىس ونەرىنىڭ وتكەنى مەن بولاشاعىن سارالاپ, ۇسىنىس, وي-پىكىرلەرىن ورتاعا سالدى. مەيماندار ورالدىڭ تاريحي ورىندارىمەن تانىسىپ, الداعى الامانعا دايىندالدى.
«نۇر وتان» پارتياسى باتىس قازاقستان وبلىستىق فيليالىنىڭ كەڭ زالىندا وتكەن «التىن دومبىرا» ايتىسى جاعىمدى جاڭالىقپەن باستالدى. اقىندار مەن كورەرمەن قاۋىمدى مەرەكەمەن قۇتتىقتاعان ءوڭىر باسشىسى عالي ەسقاليەۆ قازاقستان رەسپۋبليكاسى پرەزيدەنتى قاسىم-جومارت توقاەۆتىڭ جارلىعىن وقىپ, ايتىس ارداگەرى ءجۇرسىن ەرماننىڭ «پاراسات» وردەنىمەن, اقىن ايبەك قاليەۆتىڭ «قۇرمەت» وردەنىمەن ماراپاتتالعانىن جەتكىزدى.
بۇل باسقوسۋعا «نۇر وتان» پارتياسىنىڭ حاتشىسى عابيدوللا وسپانقۇلوۆ, قازاقستان رەسپۋبليكاسى مادەنيەت جانە سپورت ۆيتسە-ءمينيسترى نۇرقيسا داۋەشوۆ, باتىس قازاقستان وبلىسى اكىمىنىڭ ورىنباسارى سەرىك ەگىزباۆ, «نۇر وتان» پارتياسى بقو فيليالى توراعاسىنىڭ ءبىرىنشى ورىنباسارى مۇرات مۇقاەۆ قاتىستى. ايتىستىڭ قازىلار القاسىن اقىن, مەملەكەتتىك سىيلىقتىڭ لاۋرەاتى نەسىپبەك ايت ۇلى باسقارىپ, قۇرامىنا ءاسيا بەركەنوۆا, قويلىباي اسانوۆ, داريعا مۇشتانوۆا, امانجول التاەۆ, مۇحامەدجان تازابەك, جاناربەك ءاشىمجان, ريگا وڭاەۆا, باۋىرجان حاليوللا سىندى بەلگىلى اقىندار ەندى.
سونىمەن, 16 جەلتوقسان كۇنى ءتۇن ورتاسىنا دەيىن سوزىلعان ىرىكتەۋ سايىسىندا العاشقى جۇپتا ايتىسقان جانداربەك بۇلعاقوۆ (نۇر-سۇلتان) - 85 ۇپاي, جانسايا مۋسينا (ورال) -87 ۇپاي يەلەندى. ەكىنشى جۇپتاعى سەرىك قۇسانباەۆ (وسكەمەن) – 83 السا, ونىڭ قارسىلاسى ايبەك قاليەۆ (ارقالىق) – 88 ۇپايمەن العا شىقتى. ءۇشىنشى جۇپ يەلەرى بەكزات اسقاروۆ (نۇر-سۇلتان) – 82, اسەم ەرەجەقىزى (نۇر-سۇلتان) – 90 ۇپاي جينادى.
IV جۇپ: اسپانبەك شۇعاتاەۆ (پاۆلودار) – 88, شۇعايىپ سەزىمحان (الماتى) – 85.
V جۇپ: قانات مىرزاحان (تاراز) – 87, ارۋنا كەرىمبەك (اقتوبە) – 84.
VI جۇپ: ءومىرجان كوپبوسىنوۆ (قاراعاندى) – 90, جۇلدىزاي ماراتبەكقىزى (وسكەمەن) – 82.
VII جۇپ: قازىرەت بەردىحان (الماتى) – 87, ءبىرجان بايتۋوۆ (تۇركىستان) – 86.
VIII جۇپ: رۇستەم قايىرتاي (الماتى) – 90, تالعات مىقي (ورال) – 82.
IX جۇپ: باۋىرجان شەرميدەن ۇلى (ورال) – 86, ديدار قاميەۆ (قاراعاندى) – 86.
ح جۇپ: مۇحتار نيازوۆ (قىزىلوردا) – 90, شالقارباي ءىزباساروۆ (اتىراۋ) – 82.
ايتىستىڭ فينالدىق باسەكەسى بۇگىن, ياعني 17 جەلتوقسان كۇنى ساعات 15.00-دە «نۇر وتان» زالىندا جالعاسادى.
باتىس قازاقستان