تۇركىستان قالاسىندا 20 000 ابونەنتتى جىل سوڭىنا دەيىن تابيعي گازبەن قامتۋ جوسپارلانۋدا. وسىلايشا وبلىس ورتالىعىنداعى تۇرعىن ۇيلەر 56% «كوگىلدىر وتىنمەن» قامتىلادى. جالپى بيىل تۇركىستان وبلىسىندا 35 ەلدى مەكەنگە گاز قوسىلدى. جىل سوڭىنا دەيىن تاعى 50-گە جۋىق اۋىلعا تابيعي گاز تارتىلادى.
ال كۇنى كەشە ەل تاۋەلسىزدىگىنىڭ 28 جىلدىعى قارساڭىندا تۇركىستان قالاسىنداعى «وتىرار» ىقشام اۋدانىندا تۇرعىن ۇيلەر تابيعي گازبەن قامتاماسىز ەتىلدى. حالىقارالىق ماڭىزى بار «بەينەۋ-بوزوي» ماگيسترالدى گاز قۇبىرىنىڭ شاراپاتىن كورۋشىلەر قاتارىندا تۇركىستاندىقتاردىڭ سانى ارتىپ كەلەدى. الداعى كۇندەرى قالعان ابونەنتتەردى قامتۋ جۇمىستارى جالعاسىن تاپپاق. قالانى تابيعي گازبەن قامتاماسىز ەتۋ بويىنشا اۋقىمدى جۇمىستار 11 كەزەڭمەن جۇزەگە اسىرىلۋدا.
ايتا كەتەلىك, 2020 جىلدىڭ سوڭىنا دەيىن تۇركىستان قالاسىن «كوگىلدىر وتىنمەن» 100 پايىز قامتۋ جوسپارلانعان. بۇل جۇمىستار «قازترانسگازايماق» مەكەمەسىمەن بىرلەسە جۇرگىزىلۋدە. سونداي-اق وڭىردە 500-گە جۋىق ەلدى مەكەندى تابيعي گازبەن قامتۋعا مۇمكىندىك بەرەتىن قوسىمشا سمەتالىق جوبالار ازىرلەنۋدە.