كەلەشەكتىڭ قوزعاۋشى كۇشى سانالاتىن جاستاردىڭ قاتىسۋىمەن ء«وز ەلىڭدى تانى» اتتى رەسپۋبليكالىق ەكسپەديتسيا باستالدى. مۇنداعى باستى ماقسات جاس وسكىنگە قازاقتىڭ ۇلتتىق قۇندىلىقتارىن تانىتىپ, تامىرىن تەرەڭنەن تارتقان اتا تاريحىمىزدى بويىنا دارىتۋ.
ەكسپەديتسيا جۇمىسىنا وڭىرلەردەگى ەتنومادەني بىرلەستىكتەردىڭ جاستار قاناتىنىڭ مۇشەلەرى, «جاڭعىرۋ جولى» رەسپۋبليكالىق جاستار قوزعالىسىنىڭ وكىلدەرى شاقىرىلىپ, تاۋەلسىز ەلىمىزدىڭ باس قالاسىندا بىرىكتى. العاشقى كۇنى جاستار ەلوردانىڭ مادەني وشاقتارىن ارالاپ, بىلىكتى تۇلعالارمەن ء«وز ەلىڭدى ءبىل» اتتى موتيۆاتسيالىق كەزدەسۋلەرگە قاتىستى. كەزدەسۋ بارىسىندا ۆيكتورينا جانە قازاقستان تاريحىن بىلۋگە ارنالعان كۆەست ويىنى ۇيىمداستىرىلدى. ودان بولەك ەكسكۋرسيا بارىسىندا ەلوردانىڭ قاسيەتتى جەرلەرىنە ءتاۋ ەتىپ, قالانىڭ كورنەكتى ورىندارىنا ەكسكۋرسيا ۇيىمداستىرىلادى.
– وسكەلەڭ ۇرپاقتى ەلدىك پەن بىرلىككە تاربيەلەۋ, جاستاردىڭ تۋعان جەرگە سۇيىسپەنشىلىگىن ارتتىرۋ باستى مۇراتىمىز. جاھاندانۋ زامانىندا ءاربىر جاس ءۇشىن ءوز ولكەسىنىڭ تاريحىن ءبىلۋ, بابالارىنىڭ باستان كەشكەن تاريحى, كەشەگى وتكەن داۋىردەگى سوقپاقتارى جاستار ساناسىنا تىڭ سەرپىلىس بەرەرى ءسوزسىز. «رۋحاني جاڭعىرۋ» باعدارلاماسىن ىسكە اسىرۋ ماقساتىندا قازاقستان حالىقتارىنىڭ ورتاق قۇندىلىقتارىن ناسيحاتتاۋدى كوزدەيتىن «قازاقستانۋ» جوباسى ىسكە اسىرىلۋدا, – دەدى اقپارات جانە قوعامدىق دامۋ مينيسترلىگىنىڭ ەتنوسارالىق قاتىناستاردى دامىتۋ دەپارتامەنتى ديرەكتورىنىڭ ورىنباسارى ەركىن ۇسەنباەۆ. ونىڭ ايتۋىنشا, اتالعان جيىنعا نۇر-سۇلتان, الماتى, شىمكەنت, تاراز جانە سەمەي, وسكەمەن, ەكىباستۇز, ستەپنوگورسك, تەمىرتاۋ, قوستاناي, بالقاش, رۋدنىي, ليساكوۆسك سياقتى مونوقالالاردان, سونداي-اق قاراعاندى, اقمولا جانە سولتۇستىك قازاقستان, شىعىس قازاقستان, باتىس قازاقستان, ماڭعىستاۋ, قىزىلوردا, جامبىل, اقتوبە, تۇركىستان وبلىستارىنان كەلگەن 170-تەي ستۋدەنت پەن جاس مامان قاتىسىپ جاتىر.
– ءبىز ەكى كەزەڭنەن تۇراتىن ەكسپەديتسياعا قاتىسىپ جاتىرمىز. قوناقجاي نۇر-سۇلتاننىڭ ەڭ كورىكتى ورىندارىن ارالادىق. مۇنداي باسقوسۋلار ءوز تاريحىمىزدى, ءداستۇرىمىزدى تەرەڭ تانىپ-بىلۋىمىزگە كومەكتەسەدى. كەلەشەگىڭ ءۇشىن وي تۇيۋگە پايدالى دۇنيە, جاستار كوپ پايدالاناتىن ينتەرنەت الاڭىندا كەڭىنەن ايتىلۋى ءتيىس دەپ بىلەمىن, – دەيدى ءال-فارابي اتىنداعى قازۇۋ ستۋدەنتى رامينا ساتتاروۆا.
ەكسپەديتسيانىڭ كەلەسى ساپارى ابىلاي حان الاڭى, وقجەتپەس تاۋى, قۇماي ارحەولوگيالىق-ەتنوگرافيالىق كەشەنى, «بوزوق» تاريحي-مادەني ەسكەرتكىشى سىندى شەجىرە تۇنعان قاسيەتتى مەكەنگە بارۋمەن جالعاساتىن بولادى. ءىس-شارا سوڭىندا جاستار ەكسپەديتسيا تۋرالى ەلەكتروندى فوتوالبوم دايىنداپ, وعان ەكسپەديتسيا بارىسىندا قاتىسۋشىلارمەن تۇسىرىلگەن ەڭ ۇزدىك فوتوسۋرەتتەر ەنگىزىلمەك.