باتىس قازاقستان وبلىسىنداعى جاڭاقالا اۋدانى پروكۋراتۋراسى جەردى زاڭسىز قازعان جانە تۇرمىستىق قالدىقتاردى زاڭسىز توككەن وقيعالاردى انىقتاپ, كىنالىلەردى جاۋاپقا تارتتى. بۇل تۋرالى باتىس قازاقستان وبلىستىق پروكۋراتۋراسىنىڭ ءباسپاسوز قىزمەتى حابارلادى.
وقيعا بىلاي بولعان: جاڭاقالا اۋىلى ماڭىندا ءبىر جشس ارنايى رۇقساتسىز 210 تەكشە مەتر بولاتىن توپىراقتى قازىپ العان. ەكولوگيا دەپارتامەنتى مامانىنىڭ قورىتىندىسى بويىنشا, وسى ارەكەتتىڭ ناتيجەسىندە ەكولوگيالىق كودەكستىڭ 12-بابىنىڭ تالابى بۇزىلىپ, 950 مىڭ تەڭگە زالال كەلتىرىلگەن.
پروكۋرورلىق قاداعالاۋ اكتىسى نەگىزىندە ۋاكىلەتتى ورگان «جەر قويناۋىنا مەملەكەتتiك مەنشiك قۇقىعىن بۇزعانى» ءۇشىن الگى جشس-نە اكىمشىلىك قۇقىق بۇزۋشىلىق تۋرالى كودەكستىڭ 139-بابىنا سايكەس 631 مىڭ تەڭگە كولەمىندە ايىپپۇل سالدى. قورشاعان ورتاعا كەلتىرىلگەن زالالدىڭ قۇنى مەملەكەت پايداسىنا تولىق وندىرىلگەن.
سونىمەن قاتار, جاڭاقالادا تۇرمىستىق قالدىقتارعا ارنالعان پوليگون ەكولوگيالىق زاڭنامانىڭ تالاپتارىنا سايكەس كەلمەيتىنى انىقتالعان. ءسويتىپ, جاڭاقالا اۋىلدىق وكرۋگى اكىمىنىڭ اپپاراتى مەكەمەسى مەن جاڭاقالا اۋىلدىق وكرۋگىنىڭ اكىمى ا.گ.احمەتوۆ «جەردى ءبۇلدىرىپ, ءوندىرىس جانە تۇتىنۋ قالدىقتارىمەن جۇمىس ىستەۋگە, سارقىندى سۋدى اعىزۋعا قويىلاتىن تالاپتاردى بۇزعانى» ءۇشىن اكىمشىلىك قۇقىق بۇزۋشىلىق تۋرالى كودەكستىڭ 337 جانە 344 بابى بويىنشا جاۋاپكەرشىلىككە تارتىلعان. «ناتيجەسىندە اكىم اپپاراتى 63 مىڭ تەڭگە, اۋىل اكىمىنىڭ ءوزى 25 مىڭ تەڭگە كولەمىندە ايىپپۇل تولەدى» دەپ حابارلايدى پروكۋراتۋرا ورگانى.
باتىس قازاقستان