باتىس قازاقستان وبلىسى اقجايىق اۋدانىنىڭ ورتالىعى چاپاەۆ سەلوسى – توعىز جولدىڭ تورابىندا, وبلىستىڭ وڭتۇستىك اۋداندارىنا شىعار جولايىرىقتا ورنالاسقان ءىرى ەلدىمەكەن. بۇگىن وسى اۋىلداعى اۋداندىق اۋرۋحانا بازاسىندا ارنايى جاساقتالعان ينسۋلت ورتالىق اشىلدى. ورتالىق بەس اۋداننىڭ حالقىنا قىزمەت كورسەتپەك.
تۇڭعىش پرەزيدەنت كۇنى قارساڭىندا وتكەن شاراعا ءوڭىر باسشىسى عالي ەسقاليەۆ قاتىسىپ, حالىقتىڭ قۋانىشىنا ورتاقتاستى.
- ەلىمىز ەگەمەندىك العالى حالىق قامى ءۇشىن كوپتەگەن يگى ءىس اتقارىلىپ كەلەدى. سولاردىڭ ءبىرى – اۋداندىق اۋرۋحانادان اشىلعالى تۇرعان ينسۋلت ورتالىعى. وسى جەردە وبلىستىڭ اقجايىق, بوكەيوردا, جانىبەك, جاڭاقالا جانە قازتالوۆ اۋداندارىنىڭ تۇرعىندارى مەديتسينالىق قىزمەت الاتىن بولادى. جاڭا ورتالىقتىڭ قىزمەت كورسەتۋ شەڭبەرى 124 مىڭ 783 ادامدى قۇرايدى, - دەدى ءوز سوزىندە وبلىس اكىمى.
وبلىستىق بيۋدجەت ەسەبىنەن جالپى قۇنى 348 ملن تەڭگەگە جابدىقتالعان جاڭا ورتالىق 10 توسەككە جوسپارلانعان. سونىڭ ىشىندە 7 ورىن الدىن الا وڭالتۋ ىسىنە, 3 توسەك قارقىندى تەراپياعا ارنالعان. ورتالىقتا قۇنى 27 ملن 709 مىڭ تەڭگە تۇراتىن اپپاراتتار الىنعان, كىشى وپەراتسيالىق زال مەن ەكسپرەسس-زەرتحانا اشىلماق. ينسۋلت ورتالىعىندا قىزمەت ەتۋ ءۇشىن ەكى دارىگەر قايتا دايارلاۋدان وتكەن. سونداي-اق اۋرۋحانا ستاتسيونارىنا تالاپقا ساي جوندەۋ جۇمىسى جۇرگىزىلىپ, كومپيۋتەرلىك توموگرافيا اپپاراتى ورناتىلعان. وبلىس باسشىسىنىڭ ايتۋىنشا, بۇگىنگە دەيىن كومپتەرلىك توموگرافياعا ءتۇسۋ وبلىس ورتالىعىندا اقىلى كورسەتىلىپ كەلسە, كەلەر جىلدان باستاپ ول قىزمەت مەديتسينالىق ساقتاندىرۋ ارقىلى اۋدان حالقىنا تەگىن جاسالاتىن بولدى.
ورتالىقتىڭ سالتاناتتى اشىلۋ راسىمىنە قاتىسىپ, حالىق اتىنان ءسوز العان مەديتسينا ارداگەرى راۋزا شايدەنقىزى, ەڭبەك ارداگەرى ناۋقان ەسەناليەۆ اقساقال ءوڭىر باسشىلارىنىڭ قامقورلىعىنا, جەرگىلىكتى دارىگەرلەردىڭ جۇمىسىنا العىس ايتتى.
باتىس قازاقستان وبلىسىندا 2019 جىلى 9 ايدا ينسۋلت دەرتى 48,8 پايىزعا, وسى دەرت سالدارىنان ءولىم-ءجىتىم كورسەتكىشى 12,5 پايىزعا ارتقان.