تۇركىستان: كاسىپكەرلەردىڭ كومەگىمەن سالىنعان سپورتتىق نىساندار قاتارى كوبەيە تۇسۋدە  

مەملەكەتتىك-جەكەشەلىك ارىپتەستىك نەگىزىندە سالىنعان جوبانىڭ قۇنى - 434,6 ملن تەڭگە. نەگىزگى قۇرىلىسىن «اسلاي» جشس-ءى جۇرگىزگەن كەشەندە 1400-دەن استام ءجاسوسپىرىمنىڭ سپورتتىڭ فۋتبول, ۆولەيبول, باسكەتبول, كۇرەس, بوكس, سامبو, كاراتە, بادمينتون, ۇستەل تەننيسى, دزيۋدو, گرەك-ريم سىندى تۇرلەرىمەن اينالىسۋىنا مۇمكىندىك جاسالعان. «سپورتتىق-ساۋىقتىرۋ كەشەنىنە جاسوسپىرىمدەر مەن ەڭكەيگەن قارتقا دەيىن كەلىپ جاتتىعۋىنا بولادى. ياعني, ەرەسەكتەرگە ارنالعان ارنايى جاتتىعۋ زالى دا بار. سپورتتىق نىسان ءىشى ارنايى قۇرالدارمەن جابدىقتالىپ, كەلۋشىلەرگە جاعداي جاسالعان», – دەيدى «اسلاي» جشس ديرەكتورى ابزال تاعاي ۇلى.

تولەبي اۋدانىنا ىسساپارمەن بارعان وبلىس اكىمى ومىرزاق شوكەەۆ سپورت كەشەنىنىڭ اشىلۋ سالتاناتىنا قاتىستى. جاسوسپىرىمدەر اراسىندا باسكەتبولدان وبلىستىق ءتۋرنيردىڭ قاتىسۋشىلارىنا ساتتىلىك تىلەگەن وبلىس اكىمى وڭىردە سپورتتى دامىتۋ ماقساتىندا كوپتەگەن نىسان بوي كوتەرىپ جاتقانىن اتاپ ءوتتى.

«مىسالى, تۇركىستاندا ۇلكەن فۋتبول ستاديونى, وقۋشىلار سارايى, 50 مەترلىك باسسەين, ۆولەيبول, باسكەتبول, گاندبول زالدارى سالىنىپ جاتىر. سونىمەن قاتار بارلىق اۋداندا وسى سەكىلدى سپورت ورتالىقتارى, زاماناۋي ساۋىقتىرۋ كەشەندەرى اشىلۋدا. بۇل سپورتتىق كەشەننىڭ جاسوسپىرىمدەردىڭ جەتىلىپ, وسۋىندە ماڭىزى وتە زور. بارلىق جاعداي جاسالعان كەشەندە شىنىققان جاستارىمىز سپورتتىق باسەكەلەردە جەڭىمپاز اتانىپ, بايراعىمىزدى بيىكتەتەدى دەپ ويلايمىز», – دەدى ومىرزاق شوكەەۆ.

وبلىستىق ادامي الەۋەتتى دامىتۋ باسقارماسى مەن دەنە شىنىقتىرۋ جانە سپورت باسقارماسى ۇيىمداستىرعان تۋرنيرگە بارلىق اۋداننان كوماندالار قاتىستى. ايتا كەتەلىك, اۋدان اكىمى باۋىرجان وماربەكوۆتىڭ ۇيىمداستىرۋمەن جۇزەگە اسىپ جاتقان ۇيلەسىمدى تىرلىكتەردىڭ ناتيجەسىندە تۇرعىنداردىڭ سپورتپەن تۇراقتى تۇردە اينالىسۋىن قامتۋ ماقساتىنداعى نىساندار قاتارى كوبەيە تۇسۋدە. بۇگىندە 364 سپورتتىق نىساندا 35 مىڭنان استام ادام سپورتپەن اينالىسۋدا. ودان بولەك, كۇنى كەشە ءبىرىنشى مامىر اۋىلدىق وكرۋگى بەينەتكەش اۋىلىندا جەكە كاسىپكەر باعيلا اشىرباەۆانىڭ دەمەۋشىلىگىمەن «بايتەرەك» جابىق شاعىن فۋتبول الاڭشاسى اشىلدى. سونداي-اق قاسقاسۋ اۋىلىنان جەكە كاسىپكەر م.قوزىباقوۆتىڭ دەمەۋشىلىگىمەن قۇنى 150 ملن تەڭگەلىك سپورتتىق ساۋىقتىرۋ كەشەنىنىڭ قۇرىلىسى جۇرگىزىلۋدە.

تۇركىستان وبلىسى