ەلباسى نۇرسۇلتان نازارباەۆ تۇركىستان وبلىسىنا جۇمىس ساپارىنىڭ ەكىنشى كۇنى جۋرناليستەرگە بەرگەن سۇحباتىندا قارقىندى جۇرگىزىلىپ جاتقان قۇرىلىس ناتيجەسىندە جاڭا جۇمىس ورىندارى اشىلىپ جاتقانىن اتاپ ءوتتى.
«الەۋمەتتىك نىساندار, زاماناۋي اۋەجاي سالىنادى. سۋ ماسەلەسى, جول بويىنداعى قالانىڭ ينفراقۇرىلىمى تولىق شەشىمىن تابادى. ياعني قازاقستاندا تاعى ءبىر ۇلكەن قالا بوي كوتەرەدى. قۇرىلىستاردى ارالاپ كورىپ ريزا بولدىم, كوپ جۇمىس اتقارىلعان. كەلەسى جىلى كورشى, ياعني وزبەكستان, قىرعىزستان, تاجىكستان, تۇركىمەنستان ەلدەرىنىڭ مەملەكەت باسشىلارىن شاقىرايىن دەپ وتىرمىز. ولار كەلىسىمىن بەرسە, مۇمكىن تۇركىستاندا سامميت وتكىزەمىز. ەستەرىڭىزدە بولسا, ق.ا.ياساۋي كەسەنەسىنىڭ الدىندا وزبەكستانمەن ماڭگىلىك دوستىققا قول قويعانبىز. جوسپارلاپ وتىرعان كەزدەسۋدە سونداي كەلىسىم جاسايتىن شىعارمىز», - دەدى نۇرسۇلتان نازارباەۆ. سونىمەن قاتار ەلباسى جۋرناليستەر سۇراعىنا وراي تۇركىستاندا ءتۋريزمدى دامىتۋ باعىتىندا قولعا الىنعان جۇمىستارعا توقتالدى. قازبا جۇمىستارى جۇرگىزىلىپ, مۋزەيلەر سالىنىپ, سامارقاند – تاشكەنت – شىمكەنت – تۇركىستان باعىتىندا قاتىناس ورناتىلىپ جاتقانىن اتاپ ءوتتى.
جۇمىس ساپارى بارىسىندا قازاقستاننىڭ تۇڭعىش پرەزيدەنتى – ەلباسى ن.نازارباەۆ قۇرىلىسى اياقتالعان بىرقاتار نىسانداردا بولدى. تۇركىستانداعى جاڭادان اشىلعان نەكە سارايىندا جاستارمەن بەيرەسمي كەزدەسۋ وتكىزگەن ەلباسى حالىققا قىزمەت كورسەتۋ ورتالىعىنىڭ جۇمىسىمەن تانىستى. تاپسىرىس بەرۋشى قوستاناي وبلىسى بولىپ تابىلاتىن نەكە سارايىنىڭ قۇرىلىسى شىلدەدە باستالعان بولاتىن. قۇرىلىس جۇمىستارىن «B-A Contractors SA» جشس-ءى جۇرگىزىپ, قازاندا اياقتاپ وتىر. حالىققا قىزمەت كورسەتۋ ورتالىعىن سالۋدى پاۆلودار وبلىسى مىندەتىنە العان-دى. نىسان قۇرىلىسى جوسپارلانعان مەرزىمدە اياقتالدى. ال ەلىمىزدەگى ءىرى قۇرىلىس كومپانيالارىنىڭ ءبىرى «BI Group» حولدينگى تۇركىستاندا بىرنەشە نىساننىڭ قۇرىلىسىن اياقتاپ, اكىمشىلىك-ىسكەرلىك ورتالىق, «نۇر-سۇلتان» الاڭى جانە «الاتاۋ» مەديا ورتالىعىن پايدالانۋعا بەردى. جالپى قۇرىلىس كومپانياسى تۇركىستاندا 7 ماڭىزدى نىساندى سالۋدا, ونىڭ ىشىندە « ۇلى دالا» مۇراجايى, «Hampton by Hilton» قوناق ءۇيى جانە 7000 ورىندى فۋتبول ستاديونى بار.
سونداي-اق ەلباسى تۇركىستان وبلىستىق اكىمدىگىنىڭ جاڭا عيماراتىندا «Nur Otan» پارتياسى فيليالىنىڭ حالىق پەن بيلىك اراسىن جاقىنداتۋ باعىتىندا قولعا العان جوبامەن تانىستى. وبلىس اكىمى, «Nur Otan» پارتياسىنىڭ تۇركىستان وبلىستىق فيليالىنىڭ توراعاسى ومىرزاق شوكەەۆ تۇرعىنداردىڭ ءوتىنىشى مەن قۇقىقتارى ءاردايىم باستى نازاردا بولاتىنىن جەتكىزدى. ال جوبانىڭ جۇمىسىمەن ەلباسىن «Nur Otan» پارتياسىنىڭ تۇركىستان وبلىستىق فيليالى توراعاسىنىڭ ءبىرىنشى ورىنباسارى بەيسەنباي تاجىباەۆ تانىستىردى.