ەلباسى نۇرسۇلتان نازارباەۆ تۇركىستان وبلىسىنا جۇمىس ساپارى اياسىندا وبلىس ورتالىعىنداعى مادەني-اعارتۋ نىساندارىنىڭ, ءارتۇرلى باقتار مەن ارباتتىڭ قۇرىلىس جوسپارىمەن تانىستى. سونىمەن بىرگە ەلباسىنا «كۇلتوبە» قالاشىعى ارحەولوگيالىق پاركىن قۇرۋ جوسپارى تانىستىرىلدى.
قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ شىعىس قازاقستان وبلىسى تۇركىستانعا تارتۋ ەتكەن اۋەندى سۋبۇرقاق ورنالاسقان جاڭا الاڭدا قالا جۇرتشىلىعىمەن كەزدەسىپ, وبلىس ورتالىعىنىڭ الداعى ۋاقىتتا كوركەيىپ, دامي بەرەتىنىن اتاپ ءوتتى. «تەرەڭ تاريحقا ۇڭىلەتىن بولساق, بۇل – قاسيەتتى ءوڭىر, كيەلى جەر. جيىرما ءبىر حانىمىز جەرلەنگەن, سۇلتاندارىمىز بەن اۋليەلەر ماڭگىلىك تىنىشتىق تاپقان وتە كيەلى ورىن. تاۋەلسىزدىك العاننان كەيىن, ارينە مەن كونە شاھارعا ەرەكشە نازار اۋداردىم. ءتىپتى استانانى تاڭداعان كەزدە دە ءبىراز ويلاندىم. بىراق وعان جاعداي بولمادى, وزدەرىڭىز بىلەسىزدەر.
مىنە, ەندى ۋاقىتى كەلدى. تۇركىستان قالاسىن وبلىس ورتالىعى ەتىپ, قايتادان جانداندىرىپ, ەلىمىزگە وسى كيەلى وردانى قايتارۋ مۇمكىنشىلىگى تۋدى. بۇل قالا بۇكىل تۇركى دۇنيەسىنىڭ ورتالىعى ەكەنى بارىمىزگە بەلگىلى. كورشى اعايىندار وزبەكستان, قىرعىزستان, تۇرىكمەنستان قۋانىپ جاتىر. ولار دا اتسالىسىپ, بىزگە كومەكتەسەدى دەپ سەنەمىن. تۇركىستان شاھارى الداعى ۋاقىتتا ءىرى مەگاپوليسكە اينالادى. وسىدان ءبىرشاما جىل بۇرىن تۇركىستاننىڭ 1500 جىلدىعىن اتاپ وتەمىز دەپ ءبىراز شارۋانى اتقارعان ەدىك. سوندا وسى الاڭدا كەزدەسىپ, سويلەسكەنبىز. سول كەزدە تۇركىستان ورتالىق بولادى دەپ ايتقانمىن.
مىنەكەي, بىلتىر مەن تاريحي جارلىققا قول قويدىم. ەلىمىزدە الماتى, نۇر-سۇلتان جانە شىمكەنت – ءبىر ميلليون تۇرعىنى بار قالالار قاتارىندا. بولاشاقتا وسىنداي ۇلكەن قالالاردا ەكونوميكا, مادەنيەت – بارلىعى ءوسىپ-وركەندەي بەرەدى. ءبىز دە سول جولمەن جۇرەمىز. الداعى ۋاقىتتا ميلليون تۇرعىنى بار قالالار سانى تاعى ارتادى», دەدى نۇرسۇلتان نازارباەۆ.
سونداي-اق ەلباسى بۇگىندە وبلىس ورتالىعىندا قۇرىلىس قارقىن العانىن, ونىڭ ىشىندە قوجا احمەت ياساۋيگە, قازاق تاريحىنا, تۇركى تاريحىنا بايلانىستى نىساندار سالىنىپ جاتقانىن اتاپ ءوتتى. ءتۋريزمنىڭ دامي تۇسەتىنىنە سەنىم ءبىلدىردى. «تۇركىستاندا بىرنەشە كەزەڭدە 175 عيمارات سالۋ جوسپارلانعان. سونىڭ 102-ءسى بيىل ىسكە قوسىلادى. جۇمىستىڭ قانداي قارقىنمەن اتقارىلىپ جاتقانىن كورىپ وتىرسىزدار. بۇل ءۇشىن مەن وسى جەردە بارلىق وبلىستاردىڭ باسىن قوستىم. قولىنان ءىس كەلەتىن ازاماتتار ءوز شارۋاسىن دوڭگەلەتىپ اكەتىپ جاتىر. بولاشاقتا ادەمى قالا بولادى, حالىق سانى وسەدى. قازىر قالا تۇرعىندارىنىڭ سانى 170 مىڭ بولسا, مەنىڭشە از ۋاقىتتىڭ ىشىندە جارتى ميلليونعا جەتەدى. كەيىن ودان سايىن كوبەيەدى دەپ ويلايمىن», دەدى ەلباسى.
نۇرسۇلتان نازارباەۆ تۇركىستاننىڭ الداعى ۋاقىتتا تاريحي, مادەني ورتالىققا اينالاتىنىنا سەنىم ءبىلدىردى. «تۇركىستان ۇلكەن قالاعا اينالىپ, جان-جاقتان تۋريستەر كەلەتىن بولادى. بيىلدىڭ وزىندە ءبىر ميلليوننان استام تۋريست كەلىپتى. ال, مىنا عيماراتتار سالىنعاننان كەيىن تاريحي, مادەني ورتالىق قالىپتاسىپ, تۋريستەر كوپتەپ كەلەتىن بولادى. دەمەك, تۇركىستاندىقتار جۇمىسسىز قالمايدى. مىنا سالىنىپ جاتقان عيماراتتاردا, قوناقۇيلەردە قانشاما تۇركىستاندىق جۇمىس ىستەيتىن بولادى, وسى شاھاردان ناپاقاسىن تاۋىپ, حالىقتىڭ ءال-اۋقاتى جاقسارادى», دەدى نۇرسۇلتان نازارباەۆ.
ەلباسىنىڭ تۇركىستان وبلىسىنا جۇمىس ساپارى بۇگىن جالعاسىن تابۋدا.
تۇركىستان وبلىسى