تۇركىستان وبلىسى ارىس قالاسىندا اتقارىلىپ جاتقان قۇرىلىس جانە جوندەۋ جۇمىستارى اياقتالۋ ساتىسىندا تۇر. دەگەنمەن, قۇرىلىس نىساندارى اۋقىمدى نۇر – سۇلتان جانە شىمكەنت قالالارى كەستەدە بەلگىلەنگەن مەرزىمنەن كەشىگىپ كەلەدى. ەلوردالىق قۇرىلىسشىلار موينىنا العان 1167 پاتەرگە كۇردەلى جوندەۋ جۇرگىزىلسە, ءۇش كوپقاباتتى ۇيدەگى 287 پاتەر جاڭادان سالىنۋدا. بۇل ايماقتارعا قارايتىن ۇيلەردىڭ قۇرىلىسى مەن ىشكى جانە سىرتقى ارلەۋ جۇمىستارى جالعاسۋدا.
وبلىس اكىمى ومىرزاق شوكەەۆتىڭ توراعالىق ەتۋىمەن وتكەن اپپارات ءماجىلىسىنىڭ كەڭەيتىلگەن وتىرىسىندا ارىس قالاسىنداعى جۇمىس جونىندە بايانداعان سەكتور جەتەكشىلەرى وسىنداي مالىمەتتەر كەلتىردى. كۇن تارتىبىندە الدىمەن ارىس قالاسىندا اتقارىلىپ جاتقان قۇرىلىس جۇمىستارى مەن جول, كارىز جۇيەلەرىنىڭ جاڭارۋى جايلى سوڭعى مالىمەتتەر مەن 2020 جىلدان باستاپ ەلىمىزدە ەنگىزىلەتىن اتاۋلى الەۋمەتتىك كومەكتى تولەۋدىڭ جاڭا تاسىلدەرى تالقىلاندى. سونداي-اق تۇركىستان قالاسىن كوگالداندىرۋ مەن اباتتاندىرۋ جۇمىستارى بارىسى باياندالدى. تۇركىستان قالاسى جاسىل جەلەكتەندىرۋ جۇمىستارى بويىنشا ارىس تاجىريبەسى نەگىزىندە 16 سەكتورعا بولىنگەن. بۇگىندە سۋ ۇڭعىمالارى مەن قۇدىقتار قازىلىپ, زاماناۋي جاڭا ايالدامالار اشىلىپ, اعاشتار وتىرعىزىلىپ, ورىندىقتار ورناتىلۋدا, سونىمەن قاتار جولاياق پەن ۆەلوسيپەد جولىن سالۋ جۇمىستارى قارقىندى جۇرگىزىلۋدە.
كەڭەيتىلگەن وتىرىستا اتاۋلى الەۋمەتتىك كومەكتى تولەۋگە قاتىستى وبلىس بويىنشا سوڭعى دەرەكتەر جاريا ەتىلدى. بۇل رەتتە, تابىسىن جاسىرۋ, جەكە بيزنەسىنىڭ بولۋى جانە ااك الۋ شارتتارىن بۇزۋ سەكىلدى 18 مىڭنان استام دەرەك انىقتالعان. جيىندا بۇرىن تاعايىندالعان ااك قايتا ەسەپتەۋ ناتيجەسىندە 4,2 مىڭ وتباسىعا اتاۋلى الەۋمەتتىك كومەك بەرۋدەن باس تارتىلعانى, 3,1 مىڭ وتباسىعا ۋاقىتشا توقتاتىلىپ, 7,3 مىڭ وتباسىعا قايتا ەسەپتەلىنگەنى جانە ارتىق تولەنگەن 650 ملن تەڭگەنىڭ 38,8 ملن تگ قايتارىلعانى مالىمدەلدى.