الماتىدا اۋەزوۆ ەسىمى اسپەتتەلدى

الىس-جاقىننان كەلگەن قوناقتار ەڭ الدىمەن جازۋشىنىڭ زيرات باسىنا بارىپ ارۋاعىنا قۇران باعىشتادى. جەرگىلىكتى اكىمدىك پەن قالالىق «نۇر وتان» پارتياسىنىڭ وكىلدەرى, قازاق رۋحانياتىنىڭ الداسپانىنا اينالعان قابىرعالى قالامگەردىڭ ۇرپاقتارى اتىنان «م.و.اۋەزوۆ مۇراجاي ءۇيى» تورىندەگى بيۋستكە ىقىلاس گۇلدەرىن قويدى. كونفەرەنتسيا جۇمىسىن اشىپ بەرگەن م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى كەنجەحان ماتىجانوۆ وتكىزىلىپ وتىرعان «اۋەزوۆ وقۋلارى» جاس عالىمداردى ءبىر ارنادا توعىستىرعان رۋحاني وزىق الاڭعا اينالىپ كەلە جاتقانىن اتاپ ءوتتى.

« ۇلى مۇقاڭنىڭ تۋعان كۇنى ءبىز ءۇشىن ۇلتتىق مەرەكە بولۋى كەرەك. باسقاسىن ايتپاعاننىڭ وزىندە كوزى تىرىسىندە مۇراجاي سالىپ, ونى كەيىنگى ۇرپاققا مۇرا ەتىپ قالدىرعان اۋەزوۆ سياقتى قالامگەر كەمدە-كەم. اۋەزوۆ شىعارماشىلىعىن ايالاۋ, ونى ءتۇپ-تامىرىمەن زەرتتەۋ, قادىرلەۋ, جاس ۇرپاققا جەتكىزۋ ءبىزدىڭ ۇلتتىق پارىزىمىز. ادەبيەت جانە ونەر ينستيتۋتىنىڭ قۇرىلۋى مۇقاڭنىڭ ەسىمىمەن تىعىز بايلانىستى. سوندىقتان, اسىرەسە, ءبىزدىڭ عىلىم وشاعىنىڭ قىزمەتكەرلەرى ءۇشىن ءسوز ساردارىنىڭ تۋعان كۇنىنەن اسقان مەرەكە جوق», -  دەدى ول.  

ۇلى جازۋشىنىڭ بالاسى دەگەن اتاقتى الىپ ءجۇرۋدىڭ قانشالىقتى جاۋاپتى ەكەنىن تىلگە تيەك ەتكەن مادەنيەتتانۋشى-عالىم, قوعام قايراتكەرى مۇرات اۋەزوۆ «اكە تۋرالى ءسوز» تاقىرىبىندا اڭگىمە ءوربىتىپ, اكە اۋەزوۆتىڭ اسەرلى ساتتەرى تۋرالى سەزىمگە تولى ەستەلىكتەرىمەن ءبولىستى.   

– اكەم مۇحتار اۋەزوۆتىڭ ورنى مەن ءۇشىن ارينە, بولەك. ونىڭ شىعارمالار جيناعىن ازىرلەۋ بارىسىندا بۇرىن ەش جەردە جارىق كورمەگەن كوپتەگەن جاڭا دۇنيەلەرگە كەزىكتىم. ول - مۇحيتتاي شەكسىز, بار­لىق ۋاقىتىن, ءومىرىن قازاقتىڭ رۋحاني الەۋەتىن كوتەرۋگە ارناعان جان. اكەم مەنىڭ ومىرلىك جولىمدى, باعىتىمدى, بولاشاق جوسپارىمدى قىسقا ۋاقىتتا بەلگىلەپ كەتتى. ءوسىپ كەلە جاتقان شاعىمدا اكەممەن ءجيى كەزدەسىپ, بولاشاققا جوسپار قۇرىپ, ومىردە قانداي ماماندىق تاڭداۋىما دەيىن ۇلەس قوسقان. مەنىڭ ءاربىر جەتىستىگىمە قۋانىپ, ماعان ءاردايىم كوڭىلى تولىپ جۇرەتىنىن بايقايتىنمىن. سول كەزەڭدەر مەن ءۇشىن وتە باقىتتى كەزەڭدەر بولدى, – دەپ ەسكە الدى مۇرات اۋەزوۆ.

م.و.اۋەزوۆ  اتىنداعى  ادەبيەت جانە ونەر ينستيتۋتىنىڭ فولكلورتانۋ ءبولىمىنىڭ باس عىلىمي قىزمەتكەرى باقىتجان ازىباەۆا جازۋشىنىڭ قازاق فولكلورى تۋرالى تۇعىرلى كونتسەپتسياسى توڭىرەگىندە ءسوز قوزعاسا, عىلىم وشاعىنىڭ باس عىلىمي قىزمەتكەرى ايتۋلى عالىم ايگۇل ىسىماقوۆا «قازىرگى اۋەزوۆتانۋ رەسەي  ادەبيەتتانۋىندا» تاقىرىبىندا تۇششىمدى ويلارىن ورتاعا سالدى. مۇحتار اۋەزوۆتىڭ ەسىمى قالامگەرلىك قىرىمەن عانا ەمەس, قازاق تاريحىنداعى تۇڭعىش فۋتبولشىلاردىڭ ءبىرى رەتىندە دە تاريح بەتىندە تاڭبالانعانىن  بىرەۋ بىلسە, بىرەۋ بىلمەس. وسىعان وراي, باسقوسۋدا ءسوز العان الماتى قالاسى, مەدەۋ اۋدانىنىڭ اكىمى سۇلتانبەك ماكەجانوۆ جاستار اراسىندا فۋتبولدان مۇحتار اۋەزوۆ اتىنداعى  ءداستۇرلى حالىقارالىق تۋرنير وتكىزۋگە نيەتتى ەكەنىن ءبىلدىردى.

سونىمەن قاتار, كونفەرەنتسيا بارىسىندا ەلىمىزدىڭ ءار ايماعىنان باق سىناعان دارىندى وقۋشىلاردىڭ «مەنىڭ اۋەزوۆىم» اتتى شىعارماشىلىق كونكۋرسىنىڭ قورىتىندىسى جاريالانىپ, جەڭىمپازدار باعالى سىيلىقتارمەن ماراپاتتالدى. باس جۇلدەنى تۇركىستان وبلىسى, سوزاق اۋدانى, اققولتىق اۋىلىنا قاراستى ش.ۋاليحانوۆ اتىنداعى ورتا مەكتەپتىڭ 11 سىنىپ وقۋشىسى سەيتجاپپار اقتىلەك يەلەنسە, I-ورىن الماتى قالاسى №13 مەكتەپ-گيمنازياسىنىڭ  9 سىنىپ وقۋشىسى بيسەنباەۆا ايشانىڭ ەنشىسىنە بۇيىردى. الماتى قالاسى №3  جالپى ءبىلىم بەرەتىن مەكتەپتىڭ 10 سىنىپ وقۋشىسى كەربەسباي نۇرجان  جۇلدەلى II ورىننىڭ يەسى اتانسا,  III-ورىندى ش.سماعۇلوۆ اتىنداعى الماتى وبلىستىق دارىندى بالالارعا ارنالعان ماماندىرىلعان فيزيكا-ماتەماتيكا مەكتەپ-ينتەرناتىنىڭ 10 سىنىپ وقۋشىسى شاشتاي اقتوتى مەن الماتى وبلىسى, ىلە اۋدانى وتەگەن باتىر اۋىلى №38 مەكتەپ گيمنازياسىنىڭ 9 سىنىپ وقۋشىسى وسەرباي ايعانىم ءوزارا ءبولىستى. مەرەكەلىك كونفەرەنتسيا قوناقتارىنا جانە بايقاۋ جەڭىمپازدارىنا «قازاقپارات» باسپاسىنان جارىق كورگەن م.و.اۋەزوۆتىڭ «اباي جولى» رومانى سىيعا تارتىلدى.

ءىس-شارا زاڭعار جازۋشىنىڭ مۇراجاي-ۇيىندەگى ەكسكۋرسيامەن جالعاسىن تاۋىپ, اۋەزوۆ شىعارماشىلىعى حاقىندا جازىلعان قۇندى زەرتتەۋ-ەڭبەكتەردەن قۇرالعان كىتاپ كورمەسىنە ۇلاستى.

الماتى