«مەنىڭ قازاقستانىم» ءان بايقاۋى بيىل تۇركىستان قالاسىندا العاش رەت ءوتتى. جالپى وسىمەن 23 رەت ۇيىمداستىرىلىپ وتىرعان ءداستۇرلى بايقاۋدىڭ بيىلعى ەرەكشەلىگى, قاتىسۋشى ۇمىتكەرلەر ۇلى كومپوزيتور, قازاق ءۆالسىنىڭ كورولى ءشامشى قالداياقوۆتىڭ كەز كەلگەن ءانىن ورىنداپ, ونى الەۋمەتتىك جەلىگە جاريالاۋ ارقىلى داۋىس جينادى. كوپشىلىكتىڭ قولداۋىنا يە بولعاندار اقتىق كەزەڭگە جولداما الدى.
ۇيىمداستىرۋشىلاردىڭ پىكىرىنشە, ونلاين ىرىكتەۋ شالعايداعى ەلدى مەكەندەردەگى ناعىز دارىنداردى انىقتاۋعا مۇمكىندىك بەرگەن.
ءسويتىپ اقتىق كەزەڭگە جولداما العان 22 ۇمىتكەر ءشامشى اندەرىن ۇلكەن ساحنادا شىرقاۋ مۇمكىندىگىنە يە بولدى. انشىلەردىڭ ونەرىن كومپوزيتور, ءشامشىتانۋشى قالدىبەك قۇرمانالى توراعالىق ەتكەن قازىلار القاسى باعالادى. بايقاۋ قورىتىندىسى بويىنشا باس جۇلدەنى تۇركىستان وبلىستىق وپەرا جانە بالەت تەاترىنىڭ جانىنان قۇرىلعان «اربات» كۆارتەتى جەڭىپ الدى. باس جۇلدە يەگەرىنە 400 000 تەڭگە تابىستالدى. ءبىرىنشى ورىنعا وتىرار اۋدانىنان شوقان تەڭلىباەۆ, ەكىنشى ورىنعا ورداباسىلىق ءامىر بەكزات, ءۇشىنشى ورىنعا شاردارالىق دينارا ىزعالي لايىق دەپ تانىلدى.
سونداي-اق بىرقاتار بايقاۋ قاتىسۋشىلارى تۇركىستان وبلىسى اكىمىنىڭ, «مەنىڭ قازاقستانىم», «اقسۇڭقارىم», «بارىنەن دە سەن سۇلۋ», «ەڭ جاس ورىنداۋشى» ارنايى جۇلدەلەرىنە يە بولدى. بايقاۋ جەڭىمپازدارى مەن بارلىق قاتىسۋشىلار اقشالاي سىيلىقتارمەن جانە ارنايى ديپلومدارمەن ماراپاتتالدى.
تۇركىستان وبلىسى