ارىس قالاسىن قالپىنا كەلتىرۋ جۇمىستارى تولىق اياقتالۋعا جاقىن. بۇگىندە 7149 – تۇرعىن جانە كوپقاباتتى ۇيلەردە قۇرىلىس جۇمىستارى اياقتالسا, قالعان 15 نىساندا قۇرىلىس جۇمىستارى جالعاسۋدا. دەگەنمەن 10 نىسان بويىنشا مەنشىك يەلەرىنىڭ كەلىسپەۋىنەن قۇرىلىس جۇمىستارى توقتاپ تۇر.
بۇل جونىندە تۇركىستان وبلىسىنىڭ اكىمى ومىرزاق شوكەەۆتىڭ توراعالىعىمەن وتكەن ارىس قالاسىن قالپىنا كەلتىرۋ جۇمىستارىن جۇرگىزۋ بويىنشا اپپاراتتىق جيىندا وبلىستىق قۇرىلىس باسقارماسى باسشىسىنىڭ ورىنباسارى ەربول احمەتوۆ ءمالىم ەتتى. جالپى قالپىنا كەلتىرۋ جۇمىستارىنا 144 – قۇرىلىس كومپانيالارى, 4 248 – جۇمىسشى, 215 – ارنايى تەحنيكا تارتىلعان. ارىس قالاسى بويىنشا اۆتوموبيل جولدارىن جوندەۋ جۇمىستارىن جۇرگىزۋ 13 ايماقتا جوسپارلانعان. بۇگىندە جالپى 62 كوشەنىڭ 37-ءسى جوندەلگەن. قالعان 25 كوشەدە جۇمىس جۇرگىزىلۋدە, 16 كوشەگە اياقجول سالىنعان. قالاداعى 543 كوممەرتسيالىق نىساننىڭ 509-ىنا زالال كەلتىرىلگەن, ال 12 نىسان تولىعىمەن جويىلعان. جوندەۋدى قاجەت ەتكەن 68 الەۋمەتتىك نىساننىڭ 62-سىندە قۇرىلىس جۇمىستارى اياقتالدى. قالعان 6 نىساندا جۇمىس جالعاسۋدا. ەلىمىزدىڭ بارلىق وبلىستارىنان كەلگەن ارىس قالاسىنداعى قۇرىلىس جۇمىستارىنا جاۋاپتى وكىلدەرى, تۇركىستان وبلىستىق باسقارما باسشىلارى مەن اۋداندىق اكىمدىك ماماندارى قاتىسقان جيىندا ءو.شوكەەۆ قۇرىلىس نىساندارىن بەلگىلەنگەن مەرزىمدە اياقتاۋدى, ساپاعا باسا نازار اۋدارۋدى تاپسىردى.
سونداي-اق جيىندا ءسوز العان قۇرىلىسشىلار جۇمىسقا كەدەرگى كەلتىرىپ جاتقان بىرقاتار ماسەلەلەردى كوتەردى. مىسالى, ارىستاعى بىرنەشە ءۇي يەلەرى ساراپتاۋ قورىتىندىسىمەن كەلىسپەي وتىر. تۇرعىندار ۇيلەرىن كۇردەلى جوندەۋدىڭ ورنىنا تۇگەل ءسۇرىپ تاستاۋدى تالاپ ەتۋدە. مۇنداي ازاماتتارعا الدىن الا ەسكەرتۋلەر جاسالعان. قۇجاتتاردى زاڭداستىرۋعا قاتىستى كەي قيىنشىلىقتار دا بەلگىلەنگەن مەرزىمنەن كەشىگۋگە سەپ بولۋدا ەكەن. بۇل ورايدا وبلىس اكىمى بارلىق ماسەلەنى جەكە قاراپ, تۇرعىن ءۇي يەلەرىنىڭ وتىنىشتەرىن ەسكەرە وتىرىپ شەشۋ قاجەتتىگىن ايتتى.