قالاعا قولايلى كولىك

ەلەكتر قۋاتىمەن جۇرەتىن كولىك جاساۋ يدەياسى 4-5 جىلدان بەرى وتىز­داعى جىگىتتىڭ ويىندا جۇرگەن. ەسكى كولىكتى جوندەۋ, وعان كەتەتىن شىعىن ابدەن شارشاتقان سوڭ ويىنداعىنى ىسكە اسىرۋدى ۇيعارعان. ەرلاننىڭ ايتۋىنشا, بۇل ناعىز قالالىق ماشينا. ونىڭ ءبىر سەبەبى 48 ۆولتتىق قۋات كوزىمەن جىلدامدىقتى 75 كم/ساعاتتان اسىرا المايسىز. ءبىر قۋات­تاپ العان اككۋمۋلياتور كومەگىمەن كولىك 120 شاقىرىمعا دەيىن توقتاۋ­سىز جۇرە الادى. كولىكتىڭ تاعى ءبىر ەرەك­شەلىگى – ەسىگىنىڭ اشىلۋى­نان باستاپ, قوزعالىسىنا دەيىن «Bluetooth» بايلانىس ارقىلى تەلەفونمەن باسقارىلادى, كولىك ىشىندە قول كۇشىن قاجەت ەتەتىن ەشقانداي باتىرمالار جوق.

«سونىمەن قاتار باسقا كولىكتەر­دەگىدەي قوزعالتقىشتى مىندەتتى تۇر­دە تومەنگى اينالىمنان باستاماي, بىردەن 5-ءشى جىلدامدىقتان باستاپ جۇرۋگە دە بولادى. بۇل وعان ەشقانداي كۇش تۇسىرمەيدى. موتور مايىنىڭ شىعىنى دا وتە از بولادى. جۇرگەندە مۇلدە دىبىسى بىلىنبەيدى», دەيدى ەرلان دايراباي ۇلى.

ارنايى تەحنيكالىق ءبىلى­مى جوق, ماماندىعى مۋزى­كانت, ارانجيروۆكامەن جانە بەينە­تۇسىرۋمەن اينالىساتىن ەرلان

«فول­كسۆاگەن» كو­لىگىن قايتا جابدىقتاۋعا ءبىر جىل ۋاقىتىن جۇمساپتى. ارينە نە­گىزگى جۇمىسىنان بوس ۋاقىتىندا اي­نالىسقان. كوشەدە كورسەڭىز ول كولىكتەن ەشقانداي ەرەكشەلىك باي­قامايسىز. تەك سالونىنداعى ۇل­كەن مونيتور عانا وزگەشە كورىنەدى. ونىڭ توكپەن جۇرەتىنىن ىشىندە وتىر­عان ادام باعدارشامعا توقتاعان كەزىندە عانا اڭعارۋى مۇمكىن. ويت­كەنى ونداي ساتتە وزگە كولىكتەردە ءدىرىل مەن «ىرىل» بايقالسا, بۇل كولىك مۇلدە ءوشىپ تۇرعانداي ءۇنسىز كۇيدە بولادى. ەرلاننىڭ ايتۋىنشا, كولىكتىڭ توك مولشەرى 48 ۆولت­تى عانا قۇرايتىندىقتان, ادام ومىرىنە ەشقانداي قاۋپى جوق. وسىنداي ۇنەمدى دە قالاعا قولايلى كولىك جا­ساعان جىگىتتىڭ جاڭاشىل يدەيالارى كوپ ەكەن. الداعى ۋاقىتتا ءوز كاسىبىنە جاقىنداۋ, بەينەوپەراتورلاردىڭ جۇمىسىن جەڭىلدەتەتىن روبوتتىق جۇيە جاساپ شىعارماق.

شىمكەنت