كوكتوبە باۋرايىن ءبىر كۇندە ەكى رەت ءورت شارپىدى

ىشكى ىستەر مينيسترلىگى توتەنشە جاعدايلار كوميتەتىنىڭ رەسمي وكىلى نۇرسۇلتان نۇراحمەتتوۆتىڭ مالىمەتىنشە, دالالى القاپتاعى ءورت ساعات 19.58-دە تولىعىمەن ءوشىرىلدى. توسىن جاعداي تاۋ بوكتەرىندە ورىن العاندىقتان ءورتتى بىردەن ءسوندىرۋ وڭايعا سوقپاعان. ءتىلسىز جاۋدى اۋىزدىقتاۋعا 50-گە تارتا مامان مەن قوس بىردەي تىكۇشاق جۇمىلدىرىلدى. جاۋاپتى ۆەدومستۆو وكىلدەرى حابارلاعانداي, ادامدار مەن عيماراتتارعا ەشقانداي زالال تونگەن جوق. بۇل تۋرالى الماتى قالالىق توتەنشە جاعدايلار دەپارتامەنتىنىڭ باسشىسى سەرىك اۋباكىروۆ: ء«ورتتىڭ جەكە سەكتورعا اۋىسۋىنىڭ الدىن الدىق. تىكۇشاقتار قايتارىلدى. سۋدى لاقتىرۋ جۇمىستارى 12 رەت ورىندالدى. سۋدىڭ جالپى كولەمى 36 تەكشە مەتر. بۇل, وسىنداي جالىنداردى وشىرۋدە شەشۋشى قۇرال بولىپ تابىلدى. وت تولىعىمەن ءسوندىرىلدى.ءورت ءسوندىرۋ قىزمەتىنىڭ جەكە قۇرامى كەزەكشىلىك اتقارۋ ءۇشىن وقيعا ورنىندا قالدى» دەپ مالىمدەگەن بولاتىن. توتەنشەلىكتەردەن بولەك «الماتى تازالىق» كاسىپورنىنىڭ سۋارۋ كولىكتەرى دە ءتىلسىز جاۋمەن كۇرەسۋگە قاتىستى. ءورت مىڭ شارشى مەتر اۋماقتى شارپىعان.

ء داپ وسى كۇنى اراعا بىرەر  ساعاتتار سالىپ كوكتوبە تاۋىنىڭ ماڭىنانان تاعى دا ءورت شىقتى. ماماندار  قىزىل جالىنمەن ءتۇن جارىمىنا دەيىن ارپالىستى. ءورتتىڭ بەتىن قايتارۋعا 100-دەن استام ءورت ءسوندىرۋشى, سونداي-اق 40-تان استام سۋ شاشاتىن جانە ارنايى تەحنيكا قاتىسقان. جاۋاپتىلار ءتىلسىز جاۋدىڭ ءورشۋى اپتاپ ىستىقتان بولۋى مۇمكىن دەگەن جورامالعا كەلىپ وتىر. ولاردىڭ ايتۋىنشا, بىرىنەن سوڭ ءبىرى ورىن العان ەكى ءورتتىڭ اراسىندا ەشقانداي بايلانىس جوق. دەگەنمەن وقيعا ورنىنا ءتۇن ورتاسىندا كەلگەن الماتى قالاسىنىڭ اكىمى باقىجان ساعىنتاەۆ ىشكى ىستەر جانە قورعانىس مينيسترلىگى وكىلدەرىمەن سويلەسكەنىن جانە ءورت سالدارى انىقتالىپ جاتقانىن جەتكىزدى.

توتەنشە جاعدايلار دەپارتامەنتىنىڭ باسشىسى سەرىك اۋباكىروۆ ءورتتى ءسوندىرۋ كەزىندە ءبىر ادامنىڭ دەنەسى تابىلعانىن حابارلاعان بولاتىن. ارتىنشا دەپارتامەنتتىڭ ءباسپاسوز قىزمەتى الماتى پوليتسەيلەرى ازاماتتىڭ كىم ەكەنىن, ونىڭ قالاي مەرت بولعانىن انىقتاپ جاتقانىن, ءولىم سەبەبىن انىقتاۋ ءۇشىن بىرنەشە ساراپتاما تاعايىندالعانىن ايتتى.

الماتى