بۇعان دەيىن الەۋمەتتىك جەلىدە كورتەجگە قاتىسقان كولىكتەردىڭ ءبىرى الدىڭعى مەملەكەتتىك ءنومىرسىز ارتقا قاراي جۇرگەنى بەينەلەنگەن ۆيدەو تاراعان ەدى.
«بەينەماتەريالدان بەلگىلى بولعانداي, ولار جول ەرەجەلەرىن بۇزاتىندىقتارىن ءبىلىپ, نومىرلىك بەلگىلەرىن شەشىپ تاستاعان. Mercedes-Benz-ءتىڭ 1995 جىلعى جۇرگىزۋشىسى ءتىپتى جالعان ءنومىر سالىپ الىپ كولىكتى جۇرگىزگەن, ال BMW اۆتوكولىگىنىڭ 1999 جىلعى جۇرگىزۋشىسى ارت جاعىمەن ءجۇرىپ, الدىڭعى مەملەكەتتىك ءنومىرى جوق باسقا كولىكتەردىڭ قوزعالىسىنا كەدەرگى كەلتىرگەن. كەز كەلگەن كولىك جۇرگىزۋشىسى بۇل جول ءجۇرۋ ەرەجەسىن قاتاڭ بۇزۋ ەكەنىن تۇسىنەدى. سونداي-اق, ينسپەكتورلار وزگە دە اكىمشىلىك زاڭسىزدىقتاردى انىقتادى. ارتىنان بىرنەشە حاتتاما تولتىرىلاتىنىن, سونىسىمەن جەلىدە تەرىس جاعىنان تانىمال بولاتىنىن بىلە تۇرا, وسىنداي ارەكەتكە باراتىن جاس جىگىتتەردىڭ ءىسىن ءتۇسىنۋ قيىن. ءتىپتى ايىپپۇلداردى تولەگەننەن كەيىن دە بارلىعى ماعلۇماتتار بازاسىندا قالىپ قويادى. ال قۇجاتتاردىڭ كەلەسى تەكسەرىسى كەزىندە مۇنداي ادام ينسپەكتوردىڭ كوزىنە جول قاۋىپسىزدىگىن بۇزۋشى رەتىندە كورىنەدى», - دەيدى الماتى پوليتسيا دەپارتامەنتى اكىمشىلىك پوليتسيا باسقارماسى پاترۋلدىك پوليتسياسىنىڭ مامانداندىرىلعان باتالونىنىڭ كومانديرى, پوليتسيا پودپولكوۆنيگى سەرىكجان ءابجانوۆ.
مامانداندىرىلعان باتالون كومانديرىنىڭ ايتۋىنشا, ەرەجە بۇزعاندارمەن قۇقىقتىق ءتۇسىندىرۋ جۇمىسى جۇرگىزىلگەن. ولاردىڭ اۆتوكولىكتەرى مامانداندىرىلعان تۇراقتا تۇر. Mercedes-Benz جۇرگىزۋشىسى 1 جىلعا دەيىن كولىك ايداۋ قۇقىعىنان ايىرىلۋى مۇمكىن. ءىس ماتەريالدارى شەشىم قابىلداۋ ءۇشىن ءمااس-گە جىبەرىلدى.