كاسىبي ورىنداۋشىلىق دەڭگەيى مەن اكتەرلىك شەبەرلىگى جاراسىم تاپقان ءادىلxان ماكين – قازىلار القاسى مەن التى مىڭنان استام كورەرمەننىڭ, ونىڭ سىرتىندا تىكەلەي ەفيردى تاماشالاعان ميلليونداعان فەستيۆال تىڭدارمانىن ءان تابيعاتىن تۇسىنەتىن سىرشىلدىعىمەن ءتانتى ەتتى.
«ءبىزدىڭ تۇسىمىزدا كەڭەس وداعىنىڭ اتىنان شىعاتىن ارتىستەرگە مۇلدە باسقا تالاپتار قويىلاتىن. بىزدەر حالىقارالىق كونكۋرستاردىڭ جەڭىمپازى بولۋىمىز ءتيىس ەدى. بۇگىنگى جاستارعا قاراپ وتىرىپ, سول ساتتەر ەسىمە قايتا ورالدى. مۇنداي جۇكتى جاستار عانا قايىسپاي كوتەرە الادى. قازىلىق ەتۋ دە وڭاي ەمەس ەكەن, ءبىر جاقتى تاڭداۋ قيىنعا ءتۇستى. ال ءادىلحان ءاۋ دەگەندە وزىپ شىقتى. تالانتتى ءانشى ۆوكالىمەن, شەبەر ارتىستىك قابىلەتىمەن دارالانىپ تۇر. ول – داۋسىز جەڭىمپاز», دەيدى رەسەي مەن گرۋزيانىڭ حالىق ءارتىسى, قازىلار القاسىنىڭ مۇشەسى تامارا گۆەردتسيتەلي.
ەكى كۇنگە ۇلاسقان بايقاۋدىڭ قورىتىندىسى بويىنشا 178 ۇپايدى قانجىعاسىنا بايلاعان ءادىلحان وزگە قاتارلاستارىنان وسىلايشا وق بويى سۋىرىلىپ العا شىقتى. فەستيۆالدىڭ سالتاناتتى جابىلۋىنا وراي وتكەن گالا-كونتسەرتتە جاس تالانتقا «ليرا» قۇرمەت ءمۇسىنى تابىستالدى ءارى 20 مىڭ اقش دوللارى كولەمىندە قارجىلاي سىيلىققا يە بولدى.