بۇگىندە تۇرعىن ۇيلەردى جىلدام ءارى ساپالى جوندەۋ, قالپىنا كەلتىرۋ ءۇشىن قۇرىلىسشىلار تۇندە دە جۇمىستى جالعاستىرىپ كەلەدى. وبلىس, قالا, اۋدان اكىمدىكتەرىنە بەكىتىلگەن اۋماقتاردا تۇرعىنداردى تىركەۋ, قۇجاتتار قابىلداۋ, گۋمانيتارلىق كومەك كورسەتۋ, قوقىستان تازالاۋ جانە وزگە دە جۇمىستار قىزۋ جۇرگىزىلۋدە. ماسەلەن, 1-اۋماققا اتىراۋ وبلىسى مەن جەتىساي اۋدانى جاۋاپتى. مۇندا 482 ءۇي بار. جەتىسايلىق ازاماتتار تۇندە دە شتاب جۇمىسىن توقتاتپاي, تۇرعىندارعا كومەك كورسەتۋدە. جەرگىلىكتى تۇرعىندار كومەككە كەلگەن ازاماتتارعا ريزاشىلىعىن بىلدىرۋدە. 11 شىلدەدەگى مالىمەت بويىنشا ارىستا 700-دەن استام ءۇي جوندەلدى. جالپى, قالادا 8401 ءۇي تىركەلسە, ونىڭ 7097-ءسى زاقىمدالعان. سونىمەن بىرگە 104 كوپقاباتتى ءۇيدىڭ 94-ىنە جوندەۋ جۇمىستارى تاعايىندالعان.
ايتا كەتەلىك, ارىس قالاسىنداعى توتەنشە جاعدايعا بايلانىستى 100 مىڭ تەڭگە وتەماقى بەرۋ بويىنشا جەرگىلىكتى تۇرعىنداردان قۇجاتتاردى قىسقا مەرزىمدە جيناۋعا ءتيىستى ماماندار جانە اۋدان, قالا اكىمدىكتەرىنىڭ قىزمەتكەرلەرى بەكىتىلگەن. ولار شىلدەدەن باستاپ وتەماقى الۋعا وتىنىشتەر جيناقتاۋدا. وتەماقى ۇكىمەت بەكىتكەن ءتىزىم بويىنشا بەرىلەدى. اتاپ ايتقاندا, ارىس قالاسى بويىنشا – 44 994 ادام, اقدالا اۋىل وكرۋگىندە – 4 324, قوجاتوعاي اۋىل وكرۋگى بويىنشا – 4 232, دەرمەنە اۋىل وكرۋگىندە – 2 052 ادام. جالپى ءبىرىنشى كەزەكتە 55 602 تۇرعىنعا 100 مىڭ تەڭگەدەن 5,6 ملرد تەڭگە كولەمىندە وتەماقى تولەۋ جوسپارلانىپ وتىر. وتەماقى تولەۋگە ۇكىمەتتىڭ رەزەرۆى ەسەبىنەن 3 ملرد تەڭگە, وبلىستىق بيۋدجەتتەن 1 ملرد تەڭگە جانە ارنايى قۇرىلعان «تۇركىستان» الەۋمەتتىك قورىنا تۇسكەن قارجىدان 1,6 ملرد تەڭگە بولىنەدى دەپ كۇتىلۋدە.