«امپليتۋدا» – سان الۋان تاقىرىپتا جۇمىس ىستەيتىن جاس سۋرەتشىلەر توبى. جاس تا بولسا ولار قازاقستاندا, الىس شەتەلدەردە تانىلىپ ۇلگەردى. توپتاعى سۋرەتشىلەردىڭ كوركەم تىلدەرى ءتۇرلى بولعانىمەن, ءتورت سۋرەتشىنىڭ باسىن قوسىپ, ورتاقتاستىراتىن دۇنيە – تۇسكە دەگەن قۇشتارلىق. كورمەدەگى «تاڭعاجايىپ ادامدار» باعدارلاماسى ارقىلى تمد ەلدەرى كورەرمەندەرىنە كەڭ تانىلعان, سۋرەتتى كوزىن جۇمىپ سالاتىن رەنات ەلۋباەۆتىڭ, ساندىك-قولدانبالى ونەرمەن قاتار كەسكىندەمەمەن, سونداي-اق قوعامدىق جۇمىستارمەن دە بەلسەنە اينالىساتىن گۇلدانا جۇرقاباەۆانىڭ سيۋجەتتى كارتينالارى مازمۇن كەڭدىگىمەن ەرەكشەلەنەدى. ال ابستراكتىلى بەينەلەۋ ارقىلى يدەيانى اشىق بوياۋلار ارقىلى اسەرلى جەتكىزەتىن ماريا بەندارسكايا مەن ۆەنەتسيا بيەننالەسىنىڭ قاتىسۋشىسى, قازاقستانعا ارنايى شاقىرۋمەن كەلگەن سۋرەتشى «استانا وپەرا» تەاترىمەن تىعىز شىعارماشىلىق قارىم-قاتىناستا جۇمىس ىستەپ ءجۇرگەن نايرا تۋمانياننىڭ سوڭعى جۇمىستارى سۋرەتشى ءتۇيسىنگەن شىندىقتى ايقىن كورسەتەدى.
عارىشتىق اتموسفەرانى كەنەپ بەتىنە سۋرەتتەگەن اۆتور گۇلدانا جۇرقاباەۆا ءوز ويىن بىلاي جەتكىزەدى: «كورمەگە قويىلعان ءبىزدىڭ تۋىندىلارىمىزدى كورگەن جان نە ايتقىمىز كەلگەنىن ءسوزسىز ۇعاتىنىنا كۇمانىم جوق. اتاۋىنىڭ ءوزى ءتۇرلى-ءتۇستى كارتينالاردىڭ ەموتسيونالدى تەتىگى دەۋگە كەلەدى. سوندىقتان ءار قىلقالام يەسى – وزىنشە جاسامپاز تۇلعا. وزگە سۋرەتشىلەر سياقتى مەن دە ومىردەن, ماحابباتتان, سەزىمنەن ءنار الامىن. مەنىڭ شىعارمالارىمنىڭ باستى نىسانى ادامدار. مۇندا دا ايگىلى ەكى ايەلگە ارنالعان ەكى تۋىندىم قويىلدى. ولاردىڭ جارقىن بەينەسى, بولمىسى, شىعارماشىلىعى مەنى ەرەكشە تاڭداندىردى. مەن ولاردان ءوزىمدى كورەمىن».
جاڭا بۋىن سۋرەتشىلەرى بۇگىنگى زاماننىڭ كۋاگەرى رەتىندە كونتسەپتۋالدى شەشىمگە قۇلاش سەرمەي وتىرىپ, كومپوزيتسيالىق ىرعاقتى ارقيلى جەتكىزەدى. قۇلپىرعان بوياۋلار ديناميكاسى كورىنبەيتىن شىندىق رەاليزمىن قيال جەتەگىندە شارىقتادى. «ولاردىڭ ويلانىسى, ءۇمىتى, تابىسى, باقىتى, قيالى مەن داۋىسى جاس سۋرەتشىلەردىڭ تولاسسىز ءىزدەنىس ۇستىندە جۇرگەندەرىن كورسەتەدى. ءبىرى ابستراكتسياعا دەن قويسا, ەندى ءبىرى فورما ارقىلى ىزدەنەدى. بۇل جولعى جۇمىستارىن سالىستىرا قاراي وتىرىپ, بۇگىنگى بوياۋلارىندا سارى, قىزىل, كوك سىندى بىرىڭعاي جاعىمدى تۇستەر باسىم تۇسكەن. جاقسىلىقتى ىزدەۋ, كورگەن-بىلگەنىن ءوز شىعارماشىلىعىندا كورسەتۋ. بولدى, تولدى دەپ ايتا المايمىز, ءار كورمە – ءوسۋ, دامۋمەن ساباقتاسادى. جاستار كەشەگى مەن بۇگىنگى جەڭىستەردى ءوز جۇمىستارىندا ۇندەستىرىپ, ايداي الەمگە كورسەتە السا دەگەن تىلەگىم بار», دەگەن قازاقستاننىڭ مادەنيەت قايراتكەرى, ارداگەر سۋرەتشى ەرمەك اسىلحانوۆ جاستاردىڭ شىعارماشىلىق ىزدەنۋدەگى ۋاقىت تىنىسىن ءدوپ باسار ەركىندىك پەن بوستاندىق يدەياسىن الدىڭعى قاتارعا قويادى.