بۇگىندە قازاقستان وسى تۇراقتىلىق پەن بەيبىتشىلىكتىڭ ارقاسىندا ەكونوميكاسى قارىشتاپ دامىعان, وزىق يننوۆاتسيالارمەن سۋسىنداعان الەۋەتتى مەملەكەت رەتىندە قالىپتاستى.
ەڭ باستىسى, قازاقستان ايماقتاعى, ءتىپتى حالىقارالىق بەلدەۋدەگى قاۋىپسىزدىك پەن تۇراقتىلىقتىڭ تال بەسىگىنە اينالدى. ماسەلەن, قازاقستان بۇۇ قاۋىپسىزدىك كەڭەسىنە تۇراقتىلىق ەتكەن كەزەڭدە الەمدىك قوعامداستىق نازارىن اۋعانستانداعى كۇرمەۋى قيىن ماسەلەلەرگە اۋدارا ءبىلدى. اۋعانستانداعى شىنايى احۋالدى تەرەڭنەن قوزعاپ, جاھاندىق قاۋىپ-قاتەردى تۇيسىنە بىلگەن نۇرسۇلتان نازارباەۆتىڭ باستاماسىمەن يگى ىستەر قولعا الىندى. قازاقستان تاراپىنان دا اۋعانستان ەلىنە اۋقىمدى الەۋمەتتىك كومەكتىڭ كورسەتىلۋى وسىنىڭ ايعاعى بولىپ وتىر. ويتكەنى تەرروريزم, ەسىرتكى تاسىمالى مەن ترانسشەكارالىق قىلمىستان زارداپ شەككەن ەل الەمدىك قوعامداستىقتىڭ كومەگىنىڭ ارقاسىندا عانا ەڭسەسىن تىكتەيدى. ونىڭ ۇستىنە اتالعان ەلدەن باستاۋىن الاتىن قاۋىپ-قاتەردىڭ ايماقتاعى كورشىلەس مەملەكەتتەرگە تارالماۋىنا ەشقانداي كەپىلدىك جوق.
قازاقستاننىڭ تۇڭعىش پرەزيدەنتى سيريا داعدارىسىن جويۋعا باعىتتالعان كەلىسسوزدەردە دە تاراپتارعا ارااعايىندىق قىلىپ, جاعدايدىڭ ۋشىقپاۋىنا, ءماسەلەنىڭ بەيبىت جولمەن شەشىلۋىنە ەلەۋلى ۇلەس قوستى.
جالپى, بىزگە نۇرسۇلتان نازارباەۆتىڭ ءاربىر ۇسىنىسى, باستاماسى تەرەڭ ساراپتاۋلاردان, جان-جاعىن قامتىعان تالداۋلاردان قۇرالاتىنى ايقىن سەزىلەدى.
قازاقستان پرەزيدەنتىنىڭ تابيعي بىتىمگەرلىك قاسيەتى ايماقتاعى كورشىلەردىڭ بىتىسپەس ماسەلەلەرىن وڭتايلى شەشۋگە دە ىقپالىن تيگىزۋدە. ايتالىق, بەس مەملەكەت كاسپي تەڭىزىنىڭ قۇقىقتىق مارتەبەسىنە كەلگەندە ۇزاق جىلدار بويى كەلىسە المادى. اقىرى نۇرسۇلتان نازارباەۆ «كاسپي تەڭىزىنىڭ كونستيتۋتسياسى» دەپ باعالاعان قۇجاتقا اقتاۋ قالاسىندا قول قويىلىپ, تاراپتار مامىلەگە كەلدى. وسى كەزدە بۇرىنعى شيەلەنىستەردىڭ قالاي ورىستەيتىنىنە الەم ەلدەرى سىرتتاي كوز تىگىپ وتىرعان بولاتىن. ماسەلە ن.نازارباەۆتىڭ كۇش سالۋىمەن وڭىنان شەشىلدى.
قازاقستاننىڭ سوڭعى وتىز جىلداعى جەتىستىگىن, وركەندەۋىن نۇرسۇلتان نازارباەۆتان بولە-جارا قاراۋعا بولمايدى. وعان قوسا, قازاقستان پرەزيدەنتىنىڭ ۇقشۇ مەن ەۋرازيالىق ەكونوميكالىق وداق يدەياسىنىڭ اۆتورى جانە باستاماشىسى رەتىندەگى ەڭبەگىنىڭ ءوزى ءبىر توبە.
ءسوزىمنىڭ سوڭىندا ەڭبەك جولىن قاراپايىم جۇمىسشى رەتىندە باستاپ, حالىقارالىق كوشباسشى دەڭگەيىنە كوتەرىلگەن نۇرسۇلتان نازارباەۆتىڭ جوعارىدا اتاپ كورسەتىلگەن ەڭبەكتەرى تاريح پاراقتارىنا التىن ارىپپەن جازىلارىنا سەنەمىن. ءومىردىڭ اششى-تۇششىسىن كورىپ, ەڭبەكتىڭ ءدامىن بىلەتىن ادام رەتىندە قازاقستاننىڭ تۇڭعىش پرەزيدەنتىنىڭ الەمدىك ساياساتتاعى ورنى ءتىپتى ەرەكشە بولىپ قالا بەرەدى.
نيكيتا مەندكوۆيچ,
ەۋرازيالىق ساراپشىلار كلۋبىنىڭ جەتەكشىسى
ماسكەۋ