جاڭا ءداۋىردى اسقاقتاتا جىرلاعان زامانا جىراۋىنىڭ حالىق اراسىندا كەڭ تاراعان «ويجايلاۋ», «بازارىم-اي, نازارىم-اي», «جاس ەكپىن», «تۋعان جەر», «شىرقا, داۋسىم» سىندى داستاندارى كەشتىڭ شىرايىن كىرگىزىپ, سۋساعان تىڭدارماننىڭ قۇلاق قۇرىشىن قاندىردى. سونداي-اق كونتسەرتتە قازاقستاننىڭ ەڭبەك سىڭىرگەن قايراتكەرلەرى جانعالي ءجۇزباي, ارداق بالاجانوۆا, «استانا سازى» فولكلورلىق ءانسامبلى مەن ە.شالدىبەكوۆتىڭ شاكىرتتەرى ونەر كورسەتتى.
بالا كەزدەن قولىنا دومبىرا ۇستاپ, انگە قۇمارتىپ وسكەن ەربولات انشىلىك ونەردىڭ ناعاشى جۇرتىنان دارىعانىن ايتادى. ول الماتىداعى جۇسىپبەك ەلەبەكوۆ اتىنداعى ەسترادا-تسيرك كوللەدجىندە وقىپ, كەيىن قۇرمانعازى اتىنداعى قازاق ۇلتتىق كونسەرۆاتورياسىنىڭ «حالىق اندەرى» كافەدراسىن بىتىرگەن. جەتىسۋ ءوڭىرىندەگى جىرشىلىق-جىراۋلىق, انشىلىك ونەردىڭ قالىپتاسۋىنا زور ۇلەس قوسقان ءاسىمحان قوسپاساروۆ, الىمقۇل جامبىلوۆ, ءسابيت ورازباەۆ, حامزا ەكەيباي ۇلى سىندى تۇلعالاردىڭ الدىن كورگەن ونەرپاز حالىقتىڭ عاسىرلار بويى قالىپتاسقان رۋحاني اسىل قازىنالارىن بۇگىنگى ومىرىمەن ساباقتاستىرىپ كەلەدى.
– قازاق دەگەن ۇلت تۇرعاندا ءداستۇرلى ءانىمىز دە, ءتىلىمىز بەن ءدىنىمىز دە, تاريحىمىز بەن سالت-ءداستۇرىمىز دە ولمەيدى. ويتكەنى قازاق حالقى قانشا قيىن كەزەڭنەن, ناۋبەتتەن ءوتتى. سونىڭ وزىندە ءداستۇرلى ءان اۋىز ادەبيەتى ارقىلى وسى كۇنگە دەيىن جەتتى. قازاقتىڭ ءتول ونەرى جايلى بىزدەن كەيىنگى ۇرپاق تا بىلەدى دەپ ويلايمىن. قازىر كاسىبي ماماندار, زەرتتەۋشىلەر كوبەيىپ جاتىر. ءداستۇرلى انشىلەردىڭ ارقايسىسى شاكىرت تاربيەلەپ وتىر. وسىنداي كەزدە ءداستۇرلى ونەر نەگە اقساپ قالۋى كەرەك دەگەن وي تۋادى. كەرىسىنشە, قازاقتىڭ ءتول ونەرى دامىپ, كاسىبي ورىنداۋشىلار كوبەيەدى دەپ سەنەمىن, – دەيدى «قازاقكونتسەرت» مەملەكەتتىك كونتسەرتتىك ۇيىمىنىڭ ءسوليسى ەربولات شالدىبەكوۆ.