بايقاۋ دارىندى وقۋشىلاردى انىقتاۋ, مۋزىكالىق شەبەرلىكتى ارتتىرۋ جانە جاس مۋزىكانتتاردىڭ شىعارماشىلىق الەۋەتىن دامىتا وتىرىپ, ۇلتتىق ونەرىمىزدى ۇلىقتاۋدى ماقسات ەتەدى. بايقاۋعا ەلىمىزدىڭ تۇكپىر-تۇكپىرىنەن 12 جاستان 16 جاسقا دەيىنگى 35 جاس ونەرپاز قاتىستى. جيىندا ءسوز العان «Jas Otan» جاستار قاناتىنىڭ ءتوراعاسى داۋلەت كارىبەك قوعامدى ۇلتتىق مادەنيەت پەن قايتا جاڭعىرتۋ يدەياسىنىڭ توڭىرەگىندە ودان ءارى توپتاستىرۋ ماقساتىندا ءوتكىزىلىپ وتىرعان جيىننىڭ جاس ۇرپاق ءۇشىن ماڭىزدى ەكەنىنە توقتالدى. قازاق ۇلتتىق ونەر ۋنيۆەرسيتەتىنىڭ شىعارماشىل توبىنان قۇرالعان ادىلقازىلار شەشىمىمەن «ۇزدىك كۇيشى» اتالىمى بويىنشا بەكاسىل سابىروۆ (اتىراۋ وبلىسى) 1-ورىن, باقداۋلەت جاناتبەك (جامبىل وبلىسى) 2-ورىن, سىرسۇڭقار بازارباي ۇلى (قىزىلوردا وبلىسى) 3-ورىنعا يە بولدى. ال «ۇزدىك تەرمەشى» اتالىمىنا نۇراسىل ازات (نۇر-سۇلتان قالاسى) 1-ورىنعا, جانسايا فايزۋللاقىزى (قىزىلوردا وبلىسى) 2-ورىنعا, ايجۇلدىز ق ۇلىمجان (اتىراۋ وبلىسى) 3-ورىنعا لايىق دەپ تانىلدى. «ءداستۇرلى ءانشى» اتالىمى بويىنشا بەكبولات باقتيار ۇلى (جامبىل وبلىسى) ءبىرىنشى جۇلدەنى جەڭىپ السا, جانارىس تابىلدىعا (اتىراۋ وبلىسى) جۇلدەلى ەكىنشى ورىن, شۇعىلا نۇربايعا (نۇر-سۇلتان قالاسى) جۇلدەلى ءۇشىنشى ورىن بۇيىردى. كونكۋرسقا قاتىسقان وزگە ورەندەرگە سەرتيفيكاتتار مەن اقشالاي, باعالى سىيلىقتار ۇلەستىرىلدى.
رەسپۋبليكالىق, حالىقارالىق بايقاۋلاردىڭ ءجۇلدەگەرى اتانىپ جۇرگەن اتىراۋلىق بەكاسىل سابىروۆ وسى جولى دا «ۇزدىك كۇيشى» اتالىمى بويىنشا توپ جاردى. سالتاناتتى كەشتە قۇرمانعازىنىڭ «كوگالا ات» كۇيىن ناقىشىنا كەلتىرە شەبەر ورىنداعان ول بولاشاعىن كۇيشىلىك ونەرىمەن بايلانىستىرادى.
«العاش دومبىرانى سەگىز جاسىمدا قولعا ۇستادىم. دومبىرانى ۇيرەتىپ, ونەرگە باۋلىعان سامال مۇتەيوۆا ەسىمدى ۇستازىما العىس ءبىلدىرەمىن. 2-سىنىپ وقىپ ءجۇرگەنىمدە انام «سەنەن كۇيشى شىقپايدى» دەپ دومبىرا ۇيىرمەسىنە قاتىسۋىما قارسى بولعان ەدى. بىراق ءوزىم ايتقانىمنان قايتپاي قاتىسام دەپ شەشكەن ەدىم. بۇگىنگى بولعان جارىس ءبىزدى جاڭا دوستارمەن تانىستىردى. بايقاۋ الداعى ۋاقىتتا جالعاسسا دەيمىن. بولاشاقتا اتاقتى كۇيشى بولۋدى ارماندايمىن», دەيدى اتىراۋ بالالار ساز مەكتەبىنىڭ وقۋشىسى بەكاسىل سابىروۆ.