وسىدان ون جىل بۇرىن تاريحي وتانىنا تابان تىرەگەن س.سەمباي – ەلىندە ەلەۋلى ەڭبەك ەتىپ جۇرگەن قانداسىمىزدىڭ ءبىرى. ءبىزدى ءتانتى ەتكەنى اۋىل بالالارىنان قۇرالعان «سادات» جانە «اقەركە» بي توپتارىنىڭ رەسپۋبليكا دەڭگەيىندەگى كوركەمونەرپازدار بايقاۋىندا كوش باسىنان كورىنىپ, كوپتەگەن بايگەلەردە جوعارى ناتيجەگە قول جەتكىزگەنى. ءوزى نەگىزىن قالاعان قوس بىردەي بي توبىنا جەتەكشىلىك ەتەتىن سادەتپەن اڭگىمە بارىسىندا, تاباندى قىزدىڭ بويىنان تالماس قۋاتتىڭ تاسقىنىن كورگەندەي بولدىق. «ماقساتىم – قارادومالاق اۋىل بالالارىنان شارا مەن شۇعىلانىڭ جولىن جالعايتىن شاكىرت تاربيەلەۋ», – دەدى ول اڭگىمە اراسىندا.
– بيمەن اينالىسۋعا تۇرتكى بولعان بالا كەزدەگى ارمانىم. بيشىلىك ونەر قىز بالاسىن اسەمدىككە, نازىكتىك پەن ادەمىلىككە باۋليدى. ءتۇرلى قيمىل-قوزعالىس سىمباتىڭا ءسان بەرسە, اسەم اۋەن ىرعاعى جانىڭدى سۇلۋلاندىرا تۇسەدى. جانى سۇيگەن كاسىپپەن اينالىسقان جان شارشاۋدى بىلمەيدى, شىعارماشىلىعى ارقىلى ءوزىن باقىتتى سەزىنەدى. نەگە اۋىل بالالارىن بي ونەرىنە باۋلىماسقا دەگەن ويعا كەلدىم. اۋىلدىڭ مادەنيەت ۇيىنەن جەكە بي ۇيىرمەمدى اشتىم. بۇدان بولەك, «كەلەشەك» بوبەكجاي بالاباقشاسىندا ءان-بي جەتەكشىسى بولىپ جۇمىس ىستەيمىن. بي الەمىنە قۇلشىنىپ كەلگەن شاكىرتتەرىمنىڭ بارىنە بىردەي كوڭىل بولۋگە تىرىسامىن. دەگەنمەن, ۇيىرمە تابالدىرىعىن اتتاعان بالالار ۋاقىت وتە كەلە ىرىكتەلىپ, يكەمى بارلارى دارالانا باستايدى. مەڭگەرە الماعاندارىنىڭ ءوزى كوشباسشىلىق قابىلەتى دامىپ, شيراي تۇسەدى. بالا دەگەن العاۋسىز تۇنىق الەم. ول ءبىر نارسەگە سەنسە, سوعان جانىمەن بەرىلەدى. ءشاكىرتتەرىمنىڭ بويىنان ءسال دە بولسا تالانت ۇشقىنىن بايقاسام, سونى ءارى قاراي مازداتىپ اكەتۋگە بارىمدى سالامىن. انىق كوزىم جەتكەنى توگىلگەن تەر, وتەۋسىز قالمايدى. وقۋشىلارىممەن بىرگە وبلىستىق, رەسپۋبليكالىق بايقاۋلاردا باق سىناپ جاقسى ناتيجەلەردەن كورىنىپ ءجۇرمىز, – دەيدى س.سەمباي.
مىڭ بۇرالىپ بيلەگەندە الدىنا جان سالمايتىن كاسىبي بىلىگى جوعارى سادەتتى قالاعا دا شاقىرعاندار تابىلعان. الايدا ول بار قاجىر-قايراتىن شاكىرتتەرىنە ارناپ, ارمان-اڭسارىن اۋىلعا تاڭىپتى. ءسوزى مەن ءىسى قابىسقان ارمانشىل قازاق قىزىنىڭ ەڭبەگىن ۇلتقا قىزمەت ەتۋدىڭ جارقىن ۇلگىسى دەپ باعالاۋعا بولاتىنداي. ەڭبەگىنىڭ ارقاسىندا «ۇزدىك ۇستاز», «شىعارماشىل ۇستاز», «جاڭاشىل ۇستاز», «ۇزدىك جاس مامان» سىندى ءتوس بەلگىلەرىن يەلەنگەن سادەتكە سارقىلماس شابىت تىلەيمىز.