لوندوندا وتكەن بيىلعى «Romford Film Festival» قازاق كينوسى ءۇشىن ەلەۋلى تابىستارىمەن ەستە قالدى دەۋگە نەگىز بار. كينوفەستيۆال اياسىندا وتكەن Eurasian Creative Guild Film Festival-دە «مەنىڭ اتىم قوجا» كارتيناسى «ماڭگىلىك كلاسسيكا. الەمدىك تانۋ» قۇرمەتتى ماراپاتىنا يە بولسا, «قىز بەن تەڭىز» فيلمىندە باستى ءرولدى سومداعان اكتريسا دينارا ءشارىپوۆا فەستيۆالدىڭ «ەڭ ءۇزدىك اكتريساسى» دەپ تانىلدى. ال «فينانسيست» كارتيناسى «كورەرمەندەر كوزايىمى» سىيلىعىمەن ماراپاتتالدى.
– بۇل ەۋروپادا وتكەن العاشقى ەۋرازيالىق كينوفەستيۆال. سوعان قاراماستان فەستيۆال وتە تابىستى ءوتتى. شەتەلدىك ءارىپتەستەرىمىز كينو قورىنا, الەم ءمادەنيەتىنە جاڭا فيلم قوستىڭدار دەپ ەرەكشە قۋانىپ جاتىر. بۇل – حالىقتىق كينو. ءبىز سونى كورسەتۋدى ماقسات ەتتىك, – دەيدى «Eurasian Creative Guild Film Festival» ديرەكتورى, ديستريبيۋتور مايرا قارساقباەۆا. ونىڭ ايتۋىنشا, «Romford Film Festival» باسشىلىعى تاراپىنان ۇسىنىس تۇسكەن سوڭ «مەنىڭ اتىم قوجا» ءفيلمىن قىسقا ۋاقىت ىشىندە دۋبلياجداپ شىعارعان. ءفيلمدى دىبىستاۋعا 17 ادام قاتىسىپتى. كىشكەنتاي اكتەرلەردى امەريكا مەن ۇلىبريتانيا ەلىنىڭ قازاقستانداعى وكىلدەرىنىڭ بالالارى وقيتىن ءۇش مەكتەپتىڭ تەاتر ۇيىرمەلەرىنەن تاڭداپ العان. ءايتكەنمەن دۋبلياج جۇمىستارىن وتكىزۋگە قارجىنىڭ جوقتىعى قولبايلاۋ بولىپ, بار مۇمكىندىكتەرمەن ىسكە اسىرۋعا تۋرا كەلگەن.
«جاعدايىمىزدى تۇسىندىرگەن سوڭ ەرەسەك اكتەرلەر قولداۋ كورسەتىپ, تەگىن جۇمىس ىستەسە, بالالارعا ءوز قالتامىزدان ازىن-اۋلاق اقى تولەدىك. كوپ ادامنان قولداۋ سۇراپ, حات جازعانىمىزبەن ەش ناتيجە بولمادى. الماتى قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ مۇعالىمدەرى ءماتىندى رەداكتسيالاۋعا كومەكتەستى. اتالعان مەكتەپتىڭ ديرەكتورى گۇلفاريدا رايسوۆا اپايىمىزعا, زال مەن دىبىس رەجيسسەرىنىڭ تەگىن قىزمەتىن ۇسىنعان «قازاقفيلم» اق باسشىلىعىنا ەرەكشە العىس ءبىلدىرەمىن», دەيدى مايرا قارساقباەۆا.
بىرقاتار كوركەم جانە دەرەكتى فيلمدەردىڭ اتقارۋشى پروديۋسەرى بولىپ ۇزاق جىلداردان بەرى جۇمىس ىستەپ كەلە جاتقان مامان كينووندىرىس, دۋبلياج بەن پروكات جاعدايىن بەس ساۋساقتاي بىلەدى. «كورسەتىلىم كەزىندە لوندوندىق كورەرمەندەر بىزدەن تالانتتى مۋزىكانت نۇرعيسا تىلەنديەۆ, جازۋشى بەردىبەك سوقپاقباەۆ تۋرالى سۇرادى. سوندىقتان كلاسسيكالىق فيلمدەردى تۇپنۇسقالىق ەرەكشەلىكتەرىن ساقتاي وتىرىپ, اعىلشىن تىلىنە اۋدارىپ ۇسىنۋىمىز كەرەك. كوپتەگەن شەت مەملەكەتتەردە بولىپ ءجۇرمىن, قازاقتى تەرىس قىرىنان كورسەتەتىن قازىرگى ارزانقول فيلمدەردى وڭدى-سولدى كورسەتە بەرۋ دۇرىس ەمەس», دەگەن ول ۇلتتىق بولمىسىمىزدىڭ كوركەمدىك سيپاتىن ايشىقتايتىن شىعارمالاردىڭ سۇرانىستا ەكەنىن ايتادى.
ءداستۇرلى رومفورد فەستيۆالى كينو الاڭى رەتىندە كەزدەيسوق تاڭدالىپ وتىرعان جوق. ويتكەنى ۇلىبريتانيادا كوپتەگەن الەمدىك كينوستۋديالاردىڭ بلوكباستەرلەرى ءتۇسىرىلىپ, مونتاج جۇمىستارى جاسالادى. ۇيىمداستىرۋشىلاردىڭ ايتۋىنشا, فەستيۆال ەۋرازيالىق كينونى اعىلشىن تىلىندە ناسيحاتتاۋدى, سونداي-اق كينو ءوندىرىس وكىلدەرىن بۇكىل الەمنىڭ كاسىبي ماماندارىمەن تانىستىرۋدى ماقسات ەتەدى.