بۇگىن زاڭعار جازۋشى مۇحتار اۋەزوۆتىڭ دۇنيەدەن وتكەن كۇنى. حالىقارالىق تۇركى اكادەمياسى ۇيىمداستىرعان قازاق-قىرعىز زيالىلارىنىڭ فورۋمىنا قاتىسۋ ءۇشىن الماتىعا ارنايى كەلگەن قىرعىز دەلەگاتتارى جازۋشىنىڭ مۋزەيىنە باس سۇعىپ, ارۋاعىنا قۇرمەت رەتىندە گۇل شوقتارىن قويدى.
سۇلتان راەۆ, قادىرالى قوڭقاباەۆ باستاعان قىرعىز زيالىلارىمەن قاتار بەلگىلى تاريحشى مامبەت قويگەلديەۆ, ادەبيەتشى دانداي ىسقاق سەكىلدى قالامگەرلەر دە اۋەزوۆ مۇراجايىن ارالاپ, ۇلى كلاسسيكتىڭ ءجۇرىپ وتكەن جولىنا شولۋ جاسادى.
«مۇحتار اۋەزوۆ ەسىمى الەمگە ايگىلى قالامگەر. ول قازاق ادەبيەتىنىڭ عانا ەمەس, تۇتاس تۇركى دۇنيەسىنىڭ رۋحاني اسىل مۇراسىنا اينالعان ىرگەلى شىعارمالاردى ومىرگە اكەلدى. الماتىعا تابانى تيگەن قىرعىز عالىمدارى مەن جازۋشىلارى ونىڭ ارۋاعىنا ءتاۋ ەتىپ, قۇرمەت كورسەتپەي كەتپەيدى. اۋەزوۆتىڭ قالامىنان تۋعان شىعارمالار ءداۋىر ءۇنىن تاپ باسقان قايتالانباس تۋىندىلار»,-دەيدى قىرعىزستانداعى ماناس قىرعىز-تۇرىك ۋنيۆەرسيتەتىنىڭ پروفەسسورى, ف.ع.د. قادىرالى قوڭقاباەۆ.