«تالاپتىڭ وتى ارىنداپ» تۇرعان شاعىندا جاستاردىڭ بىلىمگە بەت الىپ, تابىسقا تالپىنۋى قانداي جاراسىمدى. مەكتەپ قابىرعاسىندا ءجۇرىپ-اق عىلىممەن اينالىسۋعا دەن قويعان جاس زياتكەردىڭ تولاعاي جەتىستىكتەرى تۋرالى ءبىز بۇعان دەيىن دە ەستىگەنبىز. قالا اكىمىنىڭ قاتىسۋىمەن ءداستۇرلى تۇردە وتەتىن ۇزدىك تۇلەكتەردى ماراپاتتاۋ راسىمىندە دارينامەن جۇزبە-ءجۇز جولىعىپ, ارمان-ماقساتتارى تۋرالى اڭگىمەلەستىك. ونىڭ يننوۆاتسيالىق تەحنولوگيالارعا قىزىعۋشىلىعى زور. كوماندالاس دوستارىمەن بىرگە اقىلدى روبوت ويلاپ تابۋعا العاشقى تالپىنىستارىن جاساپ تا ۇلگەرگەن. مەگاپوليستەگى حالىقارالىق «ميراس» مەكتەبىنىڭ تۇلەگى «IITU Robocon Games» رەسپۋبليكالىق بايقاۋىندا 2 ورىن يەلەنسە, ەكولوگيا سالاسىنداعى «Model UNESCO» سايىسىندا جۇزدەن جۇيرىك اتانعان. ماتەماتيكا ءپانىن ەرەكشە قۇلشىنىپ وقيتىن ول, بولاشاقتا قازاقستاننىڭ تەحنيكا, ەكونوميكا عىلىمدارىنا ءوز جاڭالىعىمدى اكەلسەم دەگەن ارمانىمەن ءبولىستى.
«الەمدە پايدا بولىپ جاتقان سوڭعى تەحنولوگيالىق جەتىستىكتەر, كوپتەگەن ماماندىقتاردىڭ جويىلۋىنا اكەلۋدە. ۇلكەن ۇجىمنىڭ جاسايتىن جۇمىسىن, ءبىر عانا كومپيۋتەر اتقارىپ وتىر. بۇگىندە تەحنولوگياسى دامىعان ەلدەر ەڭ باي مەملەكەتتەر. ءبىز دە وسى باعىتتا جۇمىس ىستەۋىمىز كەرەك. مەنىڭ ماقساتىم – وتاندىق عىلىمعا جاڭا لەپ اكەلىپ, اقىلدى روبوت ويلاپ تابۋ. مۇمكىندىگى شەكتەۋلى ازاماتتارعا ارنالعان بيونيكالىق بۋىندار, ەرەكشە پروتەزدەر قۇراستىرعىم كەلەدى. سەبەبى, مۇنداي قۇرالداردى مۇقتاج جاندار باسقا ەلدەردەن قىمبات باعاعا ساتىپ الۋعا ءماجبۇر. ولاردى الۋعا كوپشىلىگىنىڭ قالتاسى دا كوتەرە بەرمەيدى. جانىم قالايتىن كاسىبىم ارقىلى ادامدارعا جاقسىلىق جاساسام دەيمىن. ارماندارىم وتە كوپ. ول ءۇشىن تالماي ىزدەنۋ, ەڭبەكتەنۋ قاجەت ەكەنىن دە جاقسى بىلەم. كوپتەگەن دارىندى جاستار شەت مەملەكەتتەرگە وقۋعا بارىپ, سول جاقتا قالىپ جاتادى. مەنىڭشە, بۇل دۇرىس ەمەس. ولار ۇيرەنگەن بىلىمدەرىن, تاجىريبەلەرىن ءوز ەلىنىڭ يگىلىگىنە, دامۋىنا جۇمساۋى كەرەك», – دەيدى دارينا نۇرعاليقىزى.
ويى ۇشقىر جاس تالاپكەرمەن تىلدەسىپ وتىرىپ, ونىڭ قازاق ەكونوميكا عىلىمىنا ايتۋلى ۇلەس قوسقان اكادەميك نۇرعالي مامىروۆتىڭ قىزى ەكەنىن بىلدىك. كەنەت, «قاسقا ايعىردىڭ ق ۇلىنى قاسقا تۋماسا دا توبەل تۋادى» دەگەن ءسوز ەرىكسىز ويىمىزعا ورالدى. اكە بويىنداعى تالانت پەرزەنتىنە دارىپتى. بىزدە داريناعا جولىڭ بولسىن, جاس تالاپ دەگەن تىلەگىمىزدى ايتتىق.