«ارىستان» مامانداندىرىلعان ليتسەيى مەملەكەتىمىزدىڭ ءبىلىم بەرۋ ىسىندەگى جاڭالىقتاردىڭ ءبىرى بولىپ تابىلاتىن ەرەكشە وقۋ جوباسى. ول 2011 جىلى «نۇرسۇلتان نازارباەۆتىڭ ءبىلىم بەرۋ قورى» قوعامدىق قورىنىڭ اياسىندا قۇرىلعان. ىلە الاتاۋىنىڭ بوكتەرىندەگى تابيعاتى اسەم بەسقاينار اۋىلىنىڭ ايماعىندا ورنالاسقان كەشەندە ەلىمىزدىڭ بارلىق ايماقتارىنان كەلگەن 9 بەن 11 سىنىپتا وقيتىن 240 ءجاسوسپىرىم قايىرىمدىلىق نەگىزىندە ءبىلىم الادى. ليتسەيدىڭ ءبىتىرۋشى تۇلەكتەرى قازاقستاندىق جانە شەتەلدىك اسكەري وقۋ ورىندارىندا ءوز بىلىمدەرىن ابىرويمەن جالعاستىرىپ, ەل بەدەلىن اسقاقتاتۋدا.
ءبىلىم نىسانىنىڭ نەگىزگى ماقساتى – جاسوسپىرىمدەردى جوعارى دەڭگەيلى بىلىممەن قامتاماسىز ەتۋ, ولاردىڭ بويىندا ەرلىك, قاجىر-قايرات, توزىمدىلىك, جوعارى مادەنيەت, ازاماتتىق بورىش پەن جاڭا قازاقستاندىق ءپاتريوتيزمدى قالىپتاستىرۋ. ءداستۇر بويىنشا بيىل دا ءبىتىرۋشى تۇلەكتەرگە اتتەستاتتار مەن ارنايى ءتوس بەلگىلەرى تاپسىرىلىپ, بولاشاق ومىرلەرىنە ءسات ساپار تىلەگەن قۇتتىقتاۋلار ايتىلدى. ليتسەيستەر التىن ۇيا – «ارىستان» ليتسەيىنىڭ تۋىمەن قوشتاسىپ, بولاشاق بىتىرۋشىلەرگە ارنالعان كاپسۋلانى ورناتتى.
– قۇرمەتتى تۇلەكتەر, سىزدەر قازاقستاننىڭ بولاشاعىسىزدار. ليتسەيدە العان ءبىلىم مەن تاربيە بۇكىل ومىرلەرىڭىزگە ازىق بولادى دەپ ويلايمىن. بۇگىن ءبىتىرىپ جاتقان 80 بالانىڭ ءاربىرى ەل دامۋىنا ۇلەس قوسادى دەپ سەنەمىز. ءار مەملەكەت ءوزىنىڭ قارۋلى كۇشتەرىمەن عانا قاۋىپ-قاتەردەن قورعانا الادى. اسكەرى كۇشتى ەل عانا جاھاندانۋ الەمىندە ءوز ورنىن ساقتايدى. ال ءبىزدىڭ ارىستاندىقتار كەمەل بولاشاعىمىزدىڭ قاۋىپسىزدىگىن قورعايتىن ەليتالىق قۇرام بولىپ قالىپتاسادى. بۇگىندە ليتسەي وتان قورعاۋشىلاردىڭ ساپالى توبىن قالىپتاستىرۋعا كۇش سالۋدا. قازاقستان قارۋلى كۇشتەرىنىڭ قاتارىن تولىقتىراتىن ءبىلىمدى دە, سانالى, پاتريوت بولاشاق اسكەري قىزمەتكەرلەرگە تەك اق جول تىلەيمىز! كوك بايراعىمىز كوگىمىزدە ماڭگى جەلبىرەسىن, وتان قورعاۋشى ۇلاندار سانى مەن ساپاسى جىل سايىن ارتا بەرسىن, – دەيدى تۇلەكتەردى ءبىتىرۋ كۇنىمەن قۇتتىقتاعان ليتسەي باسشىسى زاپاستاعى گەنەرال-مايور ءسابيت تاۋلانوۆ.
ليتسەيدىڭ وقۋ-ماتەريالدىق بازاسى كومپيۋتەرمەن, ينتەربەلسەندى تاقتالارمەن جابدىقتالعان. ليتسەي زاماناۋي سىنىپتار مەن لابوراتوريالىق كەشەندەردى, مۇعالىمدەرگە ارنالعان تۇرعىن ۇيلەردى, ليتسەيستەردىڭ جاتىن ورنىن, باسسەين, سپورتتىق جاتتىعۋ كەشەندەرىن, لينگافوندىق كابينەتتەردى, مەدياتەكالاردى, مۋلتيمەديالىق شولۋ ورتالىعى جانە 20 مىڭنان استام عىلىمي جانە كوركەم ادەبيەتتەردەن تۇراتىن كىتاپ قورى بار كىتاپحانانى قامتيدى. بيىلعى وقۋ جىلىندا ليتسەي قابىرعاسىنان الماتى وبلىسى اكىمىنىڭ قولداۋىمەن ارنايى IT كابينەتى اشىلعان.
الماتى