كۇلاش ەسقازىقىزى - سسر دەنساۋلىق ساقتاۋ سالاسىنىڭ ۇزدىگى, قازاقستان رەسپۋبليكاسىنىڭ ۇلتتىق مەديتسينالىق اسسوساتسياسىنىڭ مۇشەسى بولعان, «ەڭبەك ەرەنى», انا مەن بالا دەنساۋلىعىن قورعاۋ سالاسى بويىنشا «التىن جۇرەك» ءبىرىنشى ۇلتتىق پرەمياسىنىڭ يەگەرى جانە تاعى دا باسقا كوپتەگەن توسبەلگىلەر مەن ماراپاتتاردىڭ يەگەرى. ءبىر سوزبەن ايتقاندا ناعىز ادام ءومىرىنىڭ قورعاۋشىسى.
40 جىلدان استام ەڭبەك ءوتىلى بار كۇلاش ءنادىروۆانىڭ ەڭبەك جولىنا العاشقى ساپارى №1 قالالىق كلينيكالىق اۋرۋحانانىڭ تابالدىرىعىنان باستالادى. بار جوعى 8 جىلدىڭ ىشىندە ءوزىن ناعىز مامان رەتىندە تانىتىپ دارىگەر –نەاناتولوگ قىزمەتىنەن ءبولىم مەڭگەرۋشى لاۋازىمىنا دەيىن ءوسىپ جۇمىسىن ادال اتقارادى. 90-شى جىلداردىڭ باسىندا مەديتسينا سالاسىندا ناعىز بىلىكتى مامان رەتىندە الماتى وبلىسىنىڭ دەنساۋلىق ساقتاۋ باسقارما باسشىسىنىڭ ورىنباسارى قىزمەتىن ۇسىنادى. ارينە, ول كەزدەرى زامان وتە اۋىر بولعان ەدى. كۇلاش ەسقازىقىزى قيىندىققا مويىماي دەنساۋلىق ساقتاۋ سالاسىنا ايانباي قىزمەت ەتەدى. 2006 جىلدان باستاپ ءوزىنىڭ ۇشقان ۇياسى بالالار كلينيكالىق اۋرۋحاناسىنا باس دارىگەر قىزمەتىنە تاعايىندالادى. ءوز ءىسىنىڭ ناعىز مامانى, ۇلكەن جۇرەگى جانە ادال قىزمەتى ءۇشىن ەلى ونى ۇنەمى ەلەپ-ەسكەرىپ ءجۇردى. قر ءبىرىنشى انا مەن بالا ۇلتتىق «التىن جۇرەك» ديپلومى, ەۋروپا بينەس قاۋىمداستىعى ساراپشىلارى كەڭەسىنىڭ «2010 جىلعى ۇزدىك مەنەدجەر» ديپلومى, «ۇزدىك تۇلعالار» اتتى حالىقارالىق ەنتسيكلوپەدياسىنىڭ باتىرى مەدالى سەكىلدى ماراپاتتارى از ەمەس. ول باسقارعان جىلدارى 1 قالالىق بالالار كلينيكالىق اۋرۋحاناسىندا ەداۋىر وزگەرىستەر بولىپ, ءتىپتى «ايەل باسقارعان ەڭ ۇزدىك كاسىپورىن» ديپلومى دا بەرىلگەن. 2010 جىلى ەۋروپالىق بيزنەس-اسسوساتسيالارى ءبىر اۋىزدان الماتى قالاسى 1-ءشى قالالىق بالالار جۇقپالى اۋرۋلار اۋرۋحاناسىن قارقىندى دامىپ كەلە جاتقان كومپانيا رەتىندە جالپىەۋروپالىق رەەستر قاتارىنا ەنگىزگەن. جاڭا ادىستەر مەن تەحنولوگيالاردى ەنگىزۋ ارقىلى اۋرۋحانادا كۇلاش اپايىمىز قىزمەتكەرلەرىمەن بىرىگە وتىرىپ ۇلكەن جۇمىستار اتقاردى. بالالار اۋرۋحاناسىندا ستاتسيوناردا جاتۋ ۋاقىتى 5 كۇنگە دەيىن قىسقارىپ, 1 جاستاعى بالالاردىڭ ءولىمى 2 ەسەگە ازايسا, ال جاڭا تۋىلعان نارەستەلەر اراسىندا ءولىم-ءجىتىم 3 ەسەگە دەيىن قىسقارعان. قاراپايىم جۇقپالى اۋرۋلار اۋرۋحاناسىنىڭ, سوۆەت ۇكىمەتى كەزىندەگى ەڭ الدىڭعى قاتارلى مامانداندىرىلعان مەديتسينالىق ورتالىققا اينالۋىنىڭ بىردەن-ءبىر سەبەپشىسى دە - كۇلاش ءنادىروۆا. ەڭبەك جولىنىڭ ءبارىن بالالاردىڭ دەنساۋلىعىنا ارناعان كۇلاش اپايىمىز: «مەن قانداي ماماندىق تاڭداۋ جايىن تىپتەن ويلامادىم. ويتكەنى اكەم كىشكەنە كەزىمىزدە مەنى دارىگەر, ءسىڭىلىمدى مۇعالىم بولادى دەپ انىقتاپ قويعان ەدى»,- دەيدى.
مەديتسينا ۋنيۆەرسيتەتىندە وقىعان ستۋدەنتتىك جىلدارى ول وزىنەن ءبىر كۋرس جوعارى وقيتىن بولاشاق سەرىگى قۋانىشبەكپەن تانىسادى. مەديتسينا سالاسىنا بەرىلە قىزمەت ەتكەن كۇلاش جولداسى قۋانىشبەكپەن بىرگە ءۇش بالا تاربيەلەپ-وسىرگەن. ولار قازىر تاجىريبەلى زاڭگەرلەر مەن عىلىمي اتاعى بار دارىگەرلەرگە اينالعان.
كۇلاش ەسقازىقىزى قازىرگى ۋاقىتتا الماتى قالاسى, №27 قالالىق ەمحاناسىنىڭ دارىگەر-ساراپشىسى.
كۇلاش اپاي: «دارىگەر – ەكسپەرت - بۇل جان-جاقتى ءارى قىزىقتى جۇمىس. جاس ماماندارعا كوپ جىلدان بەرى جيناعان تاجىريبەمدى ۇيرەتىپ كەلەمىن. پاتسيەنتتەرمەن سويلەسىپ مەديتسينالىق قىزمەتتىڭ ولقى تۇستارىن انىقتايمىن. زامان تالابىنا وراي مەديتسينالىق كومەك كورسەتۋدىڭ ساپاسىن ارتتىرۋعا بارىنشا ۇلەسىمدى قوسىپ ءجۇرمىن» -دەيدى. ارينە, وسىنداي بەرەرى كوپ ناعىز بىلىكتى ماماننىڭ شاكىرتتەرى دە وسال بولماسى انىق.
باعالاي بىلگەن كىسىلەرگە مەديتسينا قىزمەتكەرلەرىنىڭ تۇعىرى تايماس بيىك تۇلعا. جالپى, مەديتسينا قىزمەتكەرى بولۋ ادامعا جارىق سىيلاۋ دەگەن ءسوز ىسپەتتى. سوندىقتان, تەك ىسىمەن عانا ەمەس جۇرەگىمەن ەمدەي بىلەتىن كۇلاش اپايىمىز سياقتى اق حالاتتى ابزال جاندارىمىز كوپ بولسا ەكەن دەپ تىلەيمىز.