قازاقستان رەسپۋبليكاسىنىڭ ەڭبەك سىڭىرگەن ءارتىسى, ءانشى-تەرمەشى قالامپىر راحيموۆانىڭ 70 جىلدىعىنا ارنالعان رەسپۋبليكالىق بايقاۋ 18 بەن 45 جاس ارالىعىنداعى, قازاقستاننىڭ ونەر سالاسىنداعى رەسمي اتاعى جوق, بۇرىن تەرمەشىلەر بايقاۋىندا باس جۇلدە الماعان جىرشى-تەرمەشى قىز-كەلىنشەكتەرگە ارنالعان بولاتىن. ونەر سايىسىن قازاقستان رەسپۋبليكاسىنىڭ ەڭبەك سىڭىرگەن ءارتيسى, عاريفوللا قۇرمانعاليەۆ اتىنداعى باتىس قازاقستان وبلىستىق فيلارمونياسىنىڭ ءانشىسى ساۋلە تاۋداەۆا جەتەكشىلىك ەتكەن قازىلار القاسى قاداعالادى.
شارا بارىسىندا بايقاۋعا قاتىسۋشىلار مەن مەيماندار شىڭعىرلاۋ اۋىلىنىڭ ورتالىق ساياباعىندا ورنالاسقان قالامپىر راحيموۆا ەسكەرتكىشىنە گۇل شوعىن قويىپ, اۋداندىق ولكەتانۋ مۋزەيىندە ءوڭىر تاريحىمەن تانىستى.
ەكى كەزەڭنەن وتكەن ءان سايىسىندا انشىلەر قالامپىر راحيموۆانىڭ ءۇنتاسپادا جازىلعان اندەرىن, تەرمەلەرىن ۇرپاقتان-ۇرپاققا ناسيحاتتاپ, جىرشىلىق-تەرمەشىلىك ونەردى كەيىنگى ۇرپاققا قالىبىن بۇزباي جەتكىزىپ كەلە جاتقانىن كورسەتتى. بايقاۋدىڭ ءبىر ماقساتى – ءانشىنىڭ ەسىمىن ماڭگى ەستە ساقتاۋ بولسا, ول ۇدەدەن جەتتى دەۋگە بولادى.
قۇرامىندا شىڭعىرلاۋ اۋدانى اكىمىنىڭ ورىنباسارى ەرجان تۇرماعامبەتوۆ, باتىس قازاقستان وبلىستىق حالىق شىعارماشىلىعى ورتالىعىنىڭ ديرەكتورى ماۋلەت جۇباتوۆ, قازاقستان رەسپۋبليكاسى حالىق اعارتۋ ءىسىنىڭ ۇزدىگى, ءداستۇرلى ءانشى بايان قابيەۆا جانە رەسپۋبليكالىق انشىلەر بايقاۋلارىنىڭ جۇلدەگەرى, عاريفوللا قۇرمانعاليەۆ اتىنداعى فيلارمونيا ءانشىسى ەرنار ءومىرالى بار قازىلار القاسىنىڭ شەشىمىمەن بايقاۋدىڭ باس جۇلدەسى – 500 مىڭ تەڭگە ورالدىق ءانشى نازگۇل قابيەۆاعا ءتيدى.
ارقايسىسى 150 مىڭ تەڭگەلىك ءى ورىن جۇلدەسىنە قىزىلوردالىق نۇرايىم ەرتالاپقىزى مەن باتىس قازاقستان وبلىسىنىڭ تەرەكتى اۋدانىنان كەلگەن لاۋرا مۇحامبەتجانوۆا لايىق دەپ تانىلدى.
ورالدىق ءامينا عاينەدەنوۆا مەن اقتوبەلىك عازيزا ءابدىروۆا ءىى ورىن العانى ءۇشىن 125 مىڭ تەڭگەنىڭ سەرتيفيكاتىنا يە بولدى.
اقتاۋ قالاسىنان كەلگەن اينۇر وماروۆا, قوستانايلىق ايجان ساناي, ورالدىق اقمارال كەمەلحانوۆا ارقايسىسى 65 مىڭ تەڭگەلىك ءىىى ورىن سىيلىعىن يەلەندى.
بايقاۋعا قاتىسقان وزگە انشىلەر دە قۇر قول قالمادى. اقتوبە قالاسىنان كەلگەن ءانشى جۇلدىز ورىنبەكوۆاعا, ورالدىق ادەمى ادىلگەرەەۆاعا, بقو-نىڭ سىرىم اۋدانى اتىنان قاتىسقان گۇلنافيس يحلاسوۆاعا جانە شىڭعىرلاۋلىق ينديرا نىعمەتوۆاعا ىنتالاندىرۋ سىيلىعى – 50 مىڭ تەڭگەلىك سەرتيفيكات تابىس ەتىلدى.
باتىس قازاقستان